धरानः धरानस्थित बीपी कोइराला स्वास्थ्य विज्ञान प्रतिष्ठान धरानले कोभिड अस्पताललगायत सबै विभागका लागि आवश्यक स्टाफ नर्स पदपूर्तिको लागि लिएको अन्तर्वार्ताबाट ७५ जनालाई छनौट गरिएको छ ।
छनौटका लागि अन्तिम प्रक्रिया अन्तर्वार्ता बिहीबारबाट शुरू भई शनिबार सम्पन्न भएको थियो । अन्तवार्ता सकिएलगत्तै शनिबार अबेर राति छनौट भएकाहरूको नतिजा प्रकाशित गरिएको छ । यसअघि कार्तिक १८ गते भएको लिखित परीक्षामा २ सय १८ जनाले नाम निकालेका थिए । अन्तर्वार्तामा भने ५ जना अनुपस्थित रहेको र जम्मा २ सय १३ जनाबाट ७५ जना छनौट भएको प्रतिष्ठानका रजिष्ट्रार प्रा. डा. मोहनचन्द्र रेग्मीले जानकारी गराए ।
छनौट भएकाबाहेक अन्य सबैलाई प्रतीक्षा सूचीमा राखिएको छ । रजिष्ट्रारसहित अस्पताल निर्देशक प्रा. डा. गौरीशंकर साह, नर्सिङ चिफ तारा साह र मेट्रोन गायत्री राईले अन्तर्वार्ता लिएका थिए । यसअघि छनौटको पहिलो प्रक्रिया लिखित परीक्षामा ४ सय ८९ जना सहभागी भएका थिए ।