धरानः धरान उपमहानगरपालिकाले बीपी कोइराला स्वास्थ विज्ञान प्रतिष्ठानको माइक्रोबायोलोजी विभागलाई वासिङ मेशिन सहयोग गरेको छ । यस्तै, रोटरी क्लबले एकैपटकमा ९६ वटा स्वाब नमूना परीक्षण गर्ने पिसिआर मेसिन प्रतिष्ठानलाई प्रदान गरेको छ ।
धरान उपमहानगरका मेयर तिलक राई र उपमेयर मञ्जु भण्डारी सुवेदीले प्रतिष्ठानका माईक्रोलोजी विभागलाई वासिङ मेशिन हस्तान्तरण गरेका हुन् । एकपटकमा ८० केजीसम्म कपडा धुन सक्ने यस वासिङ मेशिन प्रतिष्ठानलाई सहयोग गरेको भन्दै धरान उपमहानगरलाई उपकुलपति प्रा. डा. ज्ञानेन्द्र गिरीले धन्यवाद दिएका थिए ।
उता रोटरी इन्टरन्यासनल डिस्ट्रीक्ट ३२९२ अन्तर्गतका रोटरी क्लब अफ विराटनगर डाउनटाउन, रोटरी क्लब अफ विराटनगर र रोटरी क्लब अफ विराटनगर फ्युजनले संयुक्त रूपमा पिसिआर मेसिन हिजो एक कार्यक्रम गरी हस्तान्तरण गरेको हो ।
इन्टरन्यासनल रोटरी इ क्लब अफ टेक्सस, युएसए को सहकार्यमा रोटरी ग्लोबल ग्रान्ट प्रोजेक्टको आर्थिक सहयोगमा सो मेसिन प्राप्त भएको थियो । मेसिनसँगै रोटरी क्लबलाई आएको आरएनए एक्सट्रयाक्टर मेसिन १ थान, संक्रमितले प्रयोग गरेको सामग्री सफा गर्ने इन्सिनरेटर २५ सेट, बेड, म्याट्रेस, दराज र भेन्टिलेटर १ थान सामग्री भने व्यवस्थापन तथा सञ्चालनका लागी प्रदेश १ को सामाजिक विकास मन्त्रालय तथा विराटनगर महानगरपालिकालाई रोटरी क्लबले प्रदान गरेको थियो ।
रोटरीले उपलब्ध गराएको अत्याधुनिक पिसिआर मेसिन प्रतिष्ठानमा ल्याएर जडान गरिसकेको माइक्रोबोयोलोजी विभागका एडिसनल प्रोफेसर डा. नारायणराज भट्टराईले जानकारी दिए । उनका अनुसार यस पिसिआर मेसिनसहित प्रतिष्ठानको ल्याबमा पिसिआर मेसिनको संख्या ३ वटा पुगेको बताए । अब भने दैनिक १५ सय वटा नमूना परीक्षण गर्ने क्षमता पुगेको समेत उनले जनाए । धरान उपमहानगरले उपलब्ध गरएको वासिङ मेसिनले पिसिआर परीक्षण गर्दा प्रयोग गरिएको कपडालाई पुनः धोएर लगाउन ठूलो राहत मिल्ने डा. भट्टराईले बताए ।