धरानः धरानस्थित बीपी कोइराला स्वास्थ्य विज्ञान प्रतिष्ठानले आफ्नै फार्मेसी चलाउने भएको छ ।
प्रतिष्ठानको बन्दै गरेको फार्मेसी भवनको ६५ प्रतिशत काम सम्पन्न भएको प्रतिष्ठानका सिभिल इन्जनियरिङ शाखा प्रमुख इञ्जिनियर विकास बस्यालले जानकारी दिए । भवन १२ करोड ३७ लाख रूपैयाँ निर्माण भइरहेको छ ।
यस्तै, प्रतिष्ठानको बन्द रहेको फार्मेसी सञ्चालनमा आएको छ । फार्मेसी सञ्चालन, व्यवस्थापन तथा अनुगमनका लागि समिति गठन गरी कार्यहरू अगाडि बढाइएको उपकुलपति प्रा. डा. ज्ञानेन्द्र गिरीले जानकारी दिए ।
हाल डा. दिलिप ठाकुरको संयोजकत्वमा समितिले फार्मेसी सञ्चालन, व्यवस्थापन तथा अनुगमनका कार्यहरू गरिरहेको जनाइएको छ । समिति गठन भएलगत्तै सबै विभागहरूसंग औषधि आवश्यकताको वार्षिक माग गरिएको डा. ठाकुरले जानकारी गराए । हाल इमरजेन्सी र गाइनो तथा बच्चा इमरजेन्सी वार्डमा रहेको फार्मेसी सञ्चालनमा रहेको जनाइएको छ ।
अबको केहीदिनमा प्रतिष्ठानको विभागहरूमा आउने ८० प्रतिशत बिरामीहरूको समस्याको लागि चाहिने औषधि प्रतिष्ठानको फार्मेसीमा नै उपलब्ध हुने जनाइएको छ । फार्मेसी पूर्णरूपमा सञ्चालनमा आएपछि बिरामीले उचित मूल्यमा औषधि प्राप्त गर्ने र ठगिनबाट जोगिने जनाइएको छ ।