धरानः धरानस्थित बीपी कोइराला स्वास्थ्य विज्ञान प्रतिष्ठान धरानमा सोमबारदेखि शुरू भएको २७ औं वार्षिक साइन्टिफिक कार्यक्रम सम्पन्न भएको छ ।
प्रतिष्ठानका उपकुलपति प्रा.डा. ज्ञानेन्द्र गिरीले सबै मिलेर प्रतिष्ठानलाई स्वास्थ्य सेवा, शिक्षा तथा अनुसन्धानमा उत्कृष्ट बनाउँदै पुरानै साखमा फर्काउन जरूरी रहेको बताए ।
कोरोना जोखिमका बीच शुक्रबार सम्पन्न भएको साइन्टिफिकको समापन कार्यक्रममा बोल्दै उनले सो कुरा बताएका हुन् । ‘प्रतिष्ठानमा हरेक वर्ष हुने साइन्टिफिक कार्यक्रम विभिन्न अनुसन्धाकर्ताको लागि विचार, विधी उत्खनन गर्ने बलियो मञ्च भएको छ । अब प्रतिष्ठानलाई स्वास्थ्य शिक्षा तथा अनुसन्धानमा उत्कृष्ट बनाउँदै पुरानै साखमा फर्काउनु आजको आवश्यकता हो ।’
१ सय ४९ वटा एबस्ट्राक (अनुसन्धानका सार्राश) मध्ये विभिन्न विधाका उत्कृष्ट ५ वटा एबस्ट्राकलाई समापनका बेला पुरस्कृत समेत गरिएको छ । जस अन्तर्गत वेस्ट ओरल पेपर फ्याक्लटी विधामा डा. अभिनय लुइँटेल बिजेता बनेका छन् भने बेस्ट ओरल पेपर पोस्ट ग्राजुएट विधामा रमु महर्जन र बेस्ट ओरल, पोष्टर केस रिपोर्ट पोस्ट ग्राजुएट विधामा डा. पुष्पा उपाध्याय विजयी बनिन् ।
यसैगरी, बेस्ट ओरल पेपर अन्डर ग्राजुएट विधामा जगतकिरण ओली र बेस्ट पोस्टर अन्डर ग्राजुएट विधामा निशान्त डल्लाकोटी विजयी बनेका छन । अर्को पोस्ट ग्राजुएटको अरिजिनल आर्टिकल पोस्टर विधामा भने कुनै पनि एबस्ट्राक प्राप्त नभएको आयोजकले जनाएको छ । बिजेतालाई मायाको चिनो र प्रमाणपत्र प्रदान गरिएको थियो । एबस्ट्राकका लागि विभिन्न विभागका प्रा.डा. तथा डाक्टरहरू गरी २६ जना निर्णायकहरू रहेका थिए ।
कोभिडको कारण यसवर्ष पहिलो पटक डिजिटल प्लाटफर्ममा कार्यक्रम गरीएकोमा अघिल्ला वर्षहरू भन्दा बढी सहभागी भएको कन्भेनर प्याथोलोजी विभागका प्रमुख प्रा.डा. परिचा उपाध्यायले जानकारी गराइन् । ‘एभिडेन्स म्याटर्सः प्रोमोटिङ रिसर्च अमिड्स्ट द ग्लोबल पान्डेमिक’ थिममा यसवर्ष आयोजित कार्यक्रमको समापनका बेला प्रतिष्ठानका शिक्षाध्यक्ष प्रा. डा. गुरूप्रसाद खनाल, डिन प्रा. डा. शिवेन्द्र झा, सहायक डिन डा. अजय यादव लगायतको उपस्थिति रहेको थियो ।