धरानः धरानस्थित बीपी कोइराला स्वास्थ्य विज्ञान प्रतिष्ठानमा कोभिड–१९ विरूद्धको ‘कोभिसिल्ड’ खोप लगाउन सुरू गरिएको छ ।
बिहान साढे १० बजे प्रतिष्ठानका उपकुलपति प्रा.डा. ज्ञानेन्द्र गिरीले खोप लगाउँदै अभियानको शुभारम्भ गरेका छन् ।
नेपाल सरकारले बुधबारबाट देशव्यापीरूपमा कोभिड विरूद्धको खोप लगाउने तयारी गरे अनुसार नै प्रतिष्ठानको फ्रन्टलाइनमा खटिएका स्वास्थ्यकर्मी, कर्मचारीलगायतहरूलाई खोप लगाउने कार्य सुरू भएको उपकुलपति गिरीले जानकारी गराए । खोप लगाएपछि आफ्नो स्वास्थ्य स्थिति सामान्य रहेको र खोप शतप्रतिशत सुरक्षित रहेको उनले बताए ।
प्रतिष्ठानका शिक्षाध्यक्ष प्रा. डा. गुरू खनाल, रजिष्ट्रार प्रा. डा. मोहनचन्द्र रेग्मी र अस्पताल निर्देशक प्रा. डा. गौरीशंकर साह समेतले खोप लगाएका थिए । पदाधिकारीहरूबाट खोप लगाउने कार्य सुरू गरी खोप सुरक्षित रहेको सन्देश प्रवाह गरिएको रजिष्ट्रार रेग्मीले जानकारी गराए । जिल्ला स्वास्थ्य कार्यालयबाट बिहान १ सय ५० भाइल खोप आइपुगेसँगै खोप कार्यक्रम सुरू गरिएको हो ।
१ भाइल खोपमा ५ एमएल हुन्छ, एक जनालाई ०.५ एमएल खोप लगाउनुपर्ने प्रतिष्ठानका सहायक अस्प्ताल निर्देशक डा. प्रमोद बरालले बताए । ‘एक भाइलले ८ देखि ९ जनालाई पुग्ने अनुमान गरिएको छ भने १ सय ५० भाइलले १३ देखि १४ सयलाई पुग्ने अनुमान छ ।’ डा. बरालले भने, खोप लगाएपछि ३० मिनेटसम्म राख्नका लागि व्यवस्था गरिएको छ । खोप लगाएको व्यक्तिलाई केही समस्या देखिन्छ भनि सावधानीका लागि सो प्रक्रिया गरिएको हो । केही भएमा उपचारको लागि सम्पूर्ण व्यवस्था रहेको छ ।’
खोप लगाउनको लागि ५ जनालाई तालिम दिइएको र एक पटकमा ४ जनाले खोप लगाउने व्यवस्था रहेको उनले बताए । प्रतिष्ठानमा कार्यरत २५ सय स्वास्थकर्मी तथा कर्मचारीहरूलाई खोप लगाइनेछ । पहिलो चरणको खोप कार्यक्रम एक साता सम्म चल्ने डा. बरालले जानकारी गराए ।