धरानः धरानमा पहिलोपटक विपन्नलाई रासन कार्ड वितरण गरिएको छ ।
धरान-१६ ले पहिलोपटक रासन कार्ड र स्वास्थ्य बिमा कार्ड वितरण गरेको वडाध्यक्ष दिलकुमार गिरीले जानकारी दिए । ‘यो सायद नेपालमै र धरानका २० वटै वडामध्ये पहिलो कार्यक्रम हो’, उनले भने, ‘अन्यले पनि यसको सिको गर्न जरुरी छ ।’
उनका अनुसार पहिलो लटमा ३२ घर परिवारलाई ६ महिनाका लागि पुग्ने रासन वितरण गरिनेछ । शनिबार नै दुईजना भन्दा माथिका परिवार हुनेलाई २५ केजी चामल, दाल, तेल र १ जना परिवार हुनेलाई १५ केजी चामल, दाल, तेल लगायतका खाद्यान्न सामग्री वितरण गरिएको जानकारी दिए ।
सामाजिक सुरक्षा तथा अन्य लक्षित बजेटबाट यस्तो कार्यक्रम ल्याइएको वडा सदस्य सुरेश श्रेष्ठले जानकारी दिए । उनले अझै विपन्न परिवार थपिने क्रम जारी रहेको र उनीहरुलाई पनि रासन कार्ड वितरण गरिने जानकारी दिए ।
यस्तै, स्वास्थ्य बिमा कार्ड पनि शनिबार नै वितरण गरिएको थियो । २० परिवारका १०० जनालाई स्वास्थ्य बिमा कार्ड वितरण गरिएको थियो ।
कार्यक्रमका प्रमुख अतिथि प्रदेश १ का सभामुख प्रदीपकुमार भण्डारी, विशेष अतिथि धरान उपमहानगरपालिकाकी उपमेयर मञ्जु भण्डारी सुवेदी, कांग्रेसका नेता मुरारी भट्टराई, नेकपाका नेता हिमाल कार्कीलगायत जनप्रतिनिधिको उपस्थितिमा रासन कार्ड र स्वास्थ्य बिमा कार्ड वितरण गरिएको थियो ।
कार्यक्रममा बोल्दै सभामुख भण्डारीले विपन्न लक्षित यस्तो कार्यक्रम धरानमा पहिलो भएको बताए । उनले राज्य छ भन्ने आभाष दिलाउन यस्तो कार्यक्रम आयोजना गरिनु सह्रानीय भएको बताए । ‘विपन्न लक्षित यस्तो कार्यक्रमले निरन्तरता पाउनुपर्छ भन्ने मेरो जोड हो’, उनले भने । कार्यक्रममा बोल्दै धरान उपमहानगरपालिकाकी उपमेयर भण्डारीले धरानको १६ नं. बाट शुरु भएको यस्तो कार्यक्रम धरानभरी नै हुनुपर्ने बताइन् । ‘यसले जनतालाई ठूलो राहत हुन्छ’, उनले भनिन्, ‘यस्तो कार्यक्रम धरानभरी नै लागू गर्दा हुन्छ ।’
कार्यक्रममा बोल्दै वडाध्यक्ष दिलकुमार गिरीले यस्तो कार्यक्रमले विपन्न वर्ग लाभान्वित हुने धारणा राखे । ‘खासमा भन्ने हो भने हामीले विपन्न घरघर चिहाउँदै यस्तो कार्यक्रम लागू गरेका छौं, आगामी दिनमा पनि यस्तो कार्यक्रमलाई थप प्रभावकारी बनाउँदै लानेछौं ।’
तस्वीरहरुः हाम्रो कोशी आवाज