धरानः धरानमा अब फोहोरको व्यवस्थापन हुने भएको छ । यसअघि धरानस्थित चारकोशे जंगलममा फोहोर डढाउँदै आएको उपमहानगरपालिकाले अब फोहोरबाट मोहर कमाउने लक्ष्य राखेको छ ।
आउँदो फागुन १५ गतेबाट प्रारम्भिक प्रशोधन गरिने निर्णय भएको उपमहानगरपालिकाका मेयर तिलक राईले जानकारी दिए । मेयर राई, प्रशासन शाखा प्रमुख विदुर खनाल, वातावरण शाखा प्रमुख भेषराज घिमिरे र वातावरण निरीक्षक राजु चौहान, भेञ्चर वेस्टु इनर्जी प्रालिका निर्देशक विपुलराज पाण्डे र वैकल्पिक उर्जा प्रवद्र्धन केन्द्र प्रदेश १ का इञ्जिनियर सुजन पौडेलसहित बसेको संयुक्त छलफलले शहरी फोहोरलाई आउँदो फागुन १५ गतेबाट प्रारम्भिक प्रशोधन गर्ने निर्णय गरेको हो ।
कुहिने फोहोर र नकुहिने फोहोर छुट्याउने मेसिन (सेक्रिगेटर) एक हप्ताभित्रमा भारतबाट छुट्ने बताइएको छ । त्यो मेशिन आइपुगेपछि फोहोरलाई प्रारम्भिक प्रशोधन गरिनेछ । धरानको अव्यवस्थित फोहोर प्रयोग गरी उर्जा उत्पादन गर्ने उद्देश्यले निर्माण सुरु गरिएको फोहोरलाई प्रशोधन गरिने भएको हो ।
२०७४ जेठ २५ गते धरानउपमहानगरपालिका, वैकल्पिक उर्जा प्रवद्र्धन केन्द्र र भेन्चर वेष्ट टु ईनर्जि प्रा.लि.बिचत्रिपक्षिय सम्झौता भएको धरान ६ स्थित पानवारीमा वैकल्पिकउर्जा प्रवद्र्धन केन्द्रको निर्माण अन्तिम चरणमा पुगेको छ ।
फोहोरलाई मोहरको रुपमा परिणत गर्न तथा सफा, स्वच्छ र सुन्दर शहर बनाउन सम्झौताअनुसार काम भइरहेको जनाएको छ । अहिले फिडिङको काम भइरहेको छ भने सिभिल संरचनाको कार्य पूर्ण रुपमा सम्पन्न भएको छ ।
वैकल्पिक उर्जा प्रवद्र्धन केन्द्र र भेन्चर वेष्ट टु प्रइनर्जी कम्पनीका अनुसार प्रशोधन केन्द्रमा शहरी फोहोरलाई प्रशोधन गरेर ग्याँस उत्पादन गर्ने र अर्गानिक मल उत्पादन गरिनेछ । नेपाल सरकार वैकल्पिक उर्जा प्रवद्र्धन केन्द्रको २० प्रतिशत र विश्व बैंकको २० प्रतिशत अनुदान रहेको छ भने भेन्चर वेस्टु इनर्जी प्रालिको ६० प्रतिशत लगानी रहेको छ ।