धरानः आदिवासी जनजाति उत्थान राष्ट्रिय प्रतिष्ठानमा सूचीकरण भएको माझी जातिको भेषभुषा तयार गर्ने १५ दिने तालिम शुरु भएको छ । नेपाल माझी उत्थान समाज धरानको आयोजनामा धरान ११ यलम्बरहाङछामा उद्घाटन भएको छ ।
नेपाल आदिवासी जनजाति नगर महासंघ धरानका सचिव हेमराज जिमी याक्खाको विशेष आतिथ्यमा उद्घाटन भएको छ । धरान उपमहानगरपालिकाको लक्षितवर्गको २०७७–७८ को बजेटबाट तालिम सञ्चालनमा आएको हो ।
विशेष अतिथी हेमराज जिमीले गत सालको लक्षित बजेट कोरोनाको कारण राहतमा कटौती भएकोले लक्षितवर्गको बजेटबाट कार्यक्रम हुन नसकेको बताए । महासंघले लोकसेवा तयारी कक्षा समेत सञ्चालन गरिने जनाउँदै उनले हाल लोकसेवा आयोगमा आवेदन माग भएकोले सबैले फारम भरेर आगामी लोकसेवा तयारी कक्षामा भाग लिन पनि आह्वान गरे ।

उद्घाटनमा महासंघका पूर्व अध्यक्ष तथा नेपाल मगर संघका धरान नगर अध्यक्ष चित्रराज थापा मगरले भाषा पहिरन नै पहिचान भएको बताए । माझी उत्थान समाज धरानका अध्यक्ष जय माझीको अध्यक्ष तामा भएको कार्यक्रममा बोल्दै उनले खोलाको भरपरेर बस्ने माझी भौतिक विकासले पुल निर्माण भएपछि नाउ खियाउने पेशा संकट परेको बताए ।
माझी समुदाय नाउ खियाउने तथा माछा मारेर जीविकोपार्जन गर्दै आएको उनले बताए । तालिममा माझी जातिले लगाउने माझी महिलाले लगाउने चौबन्दी, फरिया, स्टकोट, फेटा, कछाड उत्पादन सम्बन्धी तालिम दिने बताए । तालिममा करिब २५ जना सहभागी हुने बताए ।
धरान उपमहानगरमा माझी समुदाय २०३२ सालदेखि बसोबास गर्दै आएको अध्यक्ष माझी बताउँछन् । उनले खास थातथलो अरुण नदी, तमोर, भोटेकोसी, सुनकोशी र रामेछाप हुँदै यहाँ आएको बताए ।
हाल धरान ५ देउराली १३ घर, भोटेपुल धरान ८ मा १० धरान ११ यलम्बरहाङ चोक १४ घर वडा नम्बर १६ मा ३ घर र वडा नम्बर १३ मा ३ घरसहित धरान उपमहानगरभित्र करिब ६० घरधुरी रहेको कुरा नेपाल माझी उत्थान संघ धरानका नगर अध्यक्ष जयकुमारले बताए ।