धरानः कोरोना माहामारीको बढ्दो जोखिमलाई मध्यनजर गर्दै सुनसरी प्रशासनले पनि निषेधाज्ञा जारी गर्ने भएको छ ।
सुनसरी जिल्ला प्रशासन कार्यालयको बिहीबार बसेको बैठकले सुनसरी क्षेत्रभित्र भोलि शुक्रबारदेखि बैशाख २४ गते रातिसम्म निषेधाज्ञा जारी गर्ने निर्णय गरेको कार्यालयका सूचना अधिकारी महेशकुमार पोख्रेलले जानकारी दिएका छन् ।
प्रमुख जिल्ला अधिकारी उमेशप्रसाद ढाकालको नेतृत्वमा जिल्ला प्रशासन कार्यालयमा बसेको बैठकले वैशाख १७ देखि एक साताका लागि जिल्लाभर निषेधाज्ञा जारी गर्ने निर्णय गरेको हो ।
गत सोमबार बसेको मन्त्रिपरिषद बैठकले आवश्यकताअनुसार स्थानीय प्रशासनले निर्णय लिनसक्ने अधिकार स्थानीय प्रशासनलाई दिएको हो । सरकारले सङ्क्रामक रोग नियन्त्रण ऐन, २०२० को उपदफा २ बमोजिम पहाडी र हिमाली जिल्लामा २०० र काठमाडौं उपत्यका तथा तराईमा ५०० सक्रिय सङ्क्रमित रहेका जिल्लामा जिल्लाभर वा निश्चित क्षेत्रमा प्रमुख जिल्ला अधिकारीले निषेधाज्ञा तथा आवश्यक आदेश जारी गर्न सक्ने अधिकार दिएको छ ।
निषेधाज्ञामा सिनेमा हल, पार्टी प्यालेस, स्विमिङ पुल, शपिङ मल, सभा, सम्मेलन, गोष्ठी, तालिम, सेमिनाटर, मनोरञ्जन स्थल, सैलुन, ब्यूटी पार्लर, जिमखाना, समूहमा खेलिने खेलकुद, पुस्तकालय, संग्रहालय सञ्चालन गर्न पाइने छैन । औषधि पसल, खाद्यन्न, तरकारीलगायत अत्यावश्यक पसलहरु सञ्चालन गर्दा सरकारले तोकेको स्वास्थ्य मापदण्ड अपनाइ सञ्चालन गर्ने निर्णय भएको प्रशासनले जनाएको छ।
अत्यावश्यक बाहेकका निजी तथा सार्वजनिक सवारीसाधन चलाउन रोक लगाइएको छ भने खाद्य सामग्री र औषधि तथा स्वास्थ्य सामग्रीसम्बन्धी पसल भने सञ्चालन गर्न पाइने छ । विवाह व्रतबन्धको हकमा बढीमा १५ जनासम्म स्वास्थ्य मापदण्ड पालना गर्ने गरी जिल्ला प्रशासन कार्यालयबाट अनुमति लिनुपर्ने छ ।
विवाहमा जाँदा ब्यानरसहित दुईवटा मात्रै गाडी प्रयोग गर्नुपर्ने छ । विवाहमा जाँदा जिल्ला वा अन्तर जिल्लाका लागि पास नचाहिने तर पार्टी प्यालेस प्रयोग गर्दा भने अनिवार्य पास चाहिने छ ।
विवाह व्रतबन्धमा सहभागी भई अन्य जिल्लाबाट फर्कनुपर्दा चालकसहित बढीमा सात जनासम्मका लागि स्थानीय तहको सिफारिसमा जिल्ला प्रशासन कार्यालयबाट अनुमति लिनुपर्ने छ । मृत्यु संस्कार वा बिरामी कुरुवाका रूपमा अन्य जिल्ला जानुपर्दा विवरण खुल्ने कागजात (निवेदन, अस्पतालको कागजात वा स्थानीय तहको सिफारिस) सहित प्रशासन कार्यालयबाट पास लिनुपर्ने छ ।