धरानः धरानस्थित युएन, नवोदय कलेजमा पढ्ने छात्रालाई अन्तर्राष्ट्रिय तेक्वान्दोमा दोहोरो सफलता हात परेको छ ।
कक्षा-११ होटल म्यानजमेन्ट सङकायमा अध्यनरत् युमी राईले अन्तर्राष्ट्रिय खेलकुद मञ्चमा पुनः उत्कृष्ट प्रदर्शन गर्दै कलेज र देशकै नाम उच्च राखेकी छन् । चितवन तेक्वान्दो डोजाङ (चितवन) द्वारा आयोजित ‘१ औं सौराहा ओपनिङ इन्टरनेसनल तेक्वान्दो च्याम्पियनसीप–२०२६’ मा उनले स्वर्ण पदक जित्न सफल भएकी हुन् ।
युमीले प्रतियोगिताभर उत्कृष्ट कौशल प्रदर्शन गर्दै स्वर्ण पदकका साथै ‘बेस्ट फिमेल पुम्से प्लेयर’ को उपाधि हासिल गरिन् । सो उपाधिसँगै उनले नगद एक सय अमेरिकी डलर पुरस्कार समेत हात पारेकी छन् । नेपालसहित भारत, माल्दिभ्स, मलेसिया, अस्ट्रेलिया, बंगलादेश, सिंगापुर, जापान र साउदी अरेबिया गरी ८ देशका करिब ८०० खेलाडीहरूको प्रतिस्पर्धात्मक सहभागिता रहेको सो अन्तर्राष्ट्रिय प्रतियोगितामा युमीले जितेकी हुन् ।
कलेजका प्रिन्सिपल डम्बरकुमार तुम्बापोले युमीको यस सफलताप्रति खुशी व्यक्त गर्दै कलेजमा अध्ययनरत विद्यार्थीहरू पढाइको साथै अतिरिक्त क्रियाकलापमा पनि उत्तिकै अब्बल रहँदै आएको बताए । कलेजका जनसम्पर्क अधिकृत रामबहादुर लिम्बूका अनुसार कलेजले शैक्षिक गुणस्तरसँगै विद्यार्थीहरूको रुचि र प्रतिभा अनुसारका हरेक क्षेत्रमा निरन्तर साथ र सहयोग पुरयाउँदै आएकाले नै हाम्रा विद्यार्थीहरू राष्ट्रिय तथा अन्तर्राष्ट्रिय मञ्चहरूमा लगातार बिजेता बन्न सफल भएका हुन् ।
अनुशासित, लगनशील र पढाइका साथै खेलकुदमा पनि उत्तिकै तिखारिएकी युमी राई सहभागी भएका प्रायः हरेक प्रतियोगितामा खाली हात फर्किनु परेको छैन । कहिले स्वर्ण पदक त कहिले दोहोरो पदक जित्दै आएकी युमीको यो अन्तर्राष्ट्रिय सफलताले सिङ्गो कलेज परिवार र खेलप्रेमीहरूमा नयाँ उत्साह थपेको जनसम्पर्क अधिकृत लिम्बू बताउँछन् ।