धरानः धरानमा ५३ वर्षीय संक्रमित महिलाको मृत्यु भएको छ ।
धरान-३, की संक्रमित महिलाको धरानस्थित बीपी कोइराला स्वास्थ्य विज्ञान प्रतिष्ठानमा उपचार भइरहेको थियो । गत २१ गते उनमा कोरोना पुष्टि भएको थियो । उनी गत २३ गते अस्पताल भर्ना भएकी थिइन्  । बिहीबार १ः३८ बजे उनको मृत्यु भएको प्रतिष्ठानका सहप्रवक्ता चुरामणि पोखरेलले जानकारी दिए । उनलाई निरन्तर खोकी चलेर स्वासप्रश्वासमा समस्या आफन्तजनले अस्पताल भर्ना गरेका थिए । शवको व्यवस्थापन स्वास्थ्य मापदण्डअनुसार भइरहेको उनले जानकारी दिए । योसँगै धरानमा वैशाखयता मृत्यु हुनेको संख्या ४ पुगेको छ ।
यस्तै, मिङलाजुङ-२ मोरङका ७५ वर्षीय पुरुषको पनि मृत्यु भएको छ । उनको बिहीबार नै मृत्यु भएको हो । उनमा बिहीबार नै कोरोना पुष्टि भएको थियो । उनी २२ गते प्रतिष्ठानमा भर्ना भएको प्रतिष्ठानका सहप्रवक्ता पोखरेलले जानकारी दिए । उनको १ः०५ बजे मृत्यु भएको प्रतिष्ठानले जनाएको छ । उनीहरु दुवै दीर्घरोगी थिए ।