ताप्लेजुङः कोभिड-१९ को संक्रमण गाउँ–गाउँमा फैलिँदै गएपछि गएपछि ताप्लेजुङको सबै स्थानीय तहले अत्यावश्यकबाहेक सबै सेवा स्थगित गरेका छन् । कोभिड–१९ संक्रमण हुनबाट रोक्नका लागि जिल्ला ९ स्थानीय तहले सेवा स्थगित गरेका हुन् ।
केही स्थानीय तहहरुले अगाडिदेखि सेवा स्थगित गरे पनि फक्ताङलुङ गाउँपालिकाले बुधबारदेखि अत्यावश्यकबाहेक सेवा स्थगित गरेसँगै जिल्ला सबै स्थानीयतहरुमा सेवा स्थगित गरेका हुन् ।
संक्रमण फैलिन सक्ने जोखिमलाई ध्यानमा राखेर गाउँकार्यपालिका र वडा कार्यपालिकासहितका निकायबाट प्रदान गरिने अत्यावश्यकबाहेकका बाहेक सेवा गत मङ्गलबारदेखि नै स्थगित गरिसकेको मैवाखोला गाउँपालिकाका प्रमुख प्रशासकीय अधिकृत देवी तुम्बापोले जानकारी दिए ।
नगर क्षेत्रमा कोरोना संक्रमण बढिरहेकाले फुङ्लीङले पनि अत्यावश्यकबाहेकका सबै सेवा बन्द गरेको जनाएको छ । नगरप्रमुख छत्रपति प्याकुरेलले तत्काललाई ७ दिनका लागि अत्यावश्यकबाहेक सबै सेवा बन्द गरिएको बताए । आठराई त्रिवेणी गाउँपालिकाले स्वास्थ्यसँग सम्बन्धित र अत्यावश्यकबाहेक ७ दिनका लागि सेवा प्रवाह स्थगन गरेको छ ।
आठराई त्रिवेणी गाउँपालिका अध्यक्ष विश्वनाथ सिटौलाका अनुसार ७ दिनका लागि योजनासम्बन्धी दर्ता, सम्झौता र फरफारक, सञ्चालनमा रहेका विद्यालयका सम्पूर्ण परीक्षा, वडाबाट प्रदान गरिने सिफारिस र पञ्जीकरणसम्बन्धी सम्पूर्ण सेवा स्थगित गरिएको हो ।
यता जिल्ला प्रशासन कार्यालय ताप्लेजुङले आगामी ३ जेठसम्म ताप्लेजुङ जिल्लामा निषेधाज्ञा जारी गरेको छ । निषेधाज्ञा जारी भएपछि ताप्लेजुङको सदरमुकाम फुङलिङ बजार सुनसान छ ।