बिर्तामोडः कोरोना सङ्क्रमणका कारण झापाको अर्जुनधारा नगरपालिकाका प्रमुख प्रशासकीय अधिकृत महेन्द्रकुमार खाम्याहाङको सोमबार मृत्यु भएको छ ।
नगरपालिकाका लागि भारतीय दूतावासबाट प्राप्त भएको एम्बुलेन्स लिन काठमाडौँ पुगेर फर्किएपछि खम्याहाङलाई कोरोना सङ्क्रमण पुष्टि भएको थियो ।
५० वर्षीय खाम्याहाङ उपसचिवस्तरका कर्मचारी हुन् ।
गत वैशाख १० गते एन्टिजेन परीक्षण गर्दा उनमा कोरोना पुष्टि भएको थियो । सङ्क्रमण पुष्टि भएपछि केही दिन आफ्नै क्वार्टरमा र त्यसपछि दुई दिन नगरपालिकाले स्थापना गरेको आइसोलेसनमा बसेका उनलाई श्वासप्रश्वासमा समस्या देखिएपछि बीएन्डसी अस्पतालमा भर्ना गरिएको थियो ।
उनको उपचारका क्रममा सोमबार निधन भएको झापाका प्रमुख जिल्ला अधिकारी श्रवणकुमार तिमिल्सिनाले जानकारी दिए ।