धरानः सुनसरी जिल्लामा जेठ मसान्त अर्थात् जेठ ३१ गतेसम्मका लागि निषेधाज्ञा अर्थात् लकडाउन लम्ब्याइएको छ ।
जिल्ला प्रशासन कार्यालय सुनसरीमा आज बसेको जिल्लास्तरीय कोभिड १९ सङ्कट व्यवस्थापन केन्द्र (डिसीसीएमसी) को बैठकले जेठ मसान्तसम्मको लागि निषेधाज्ञा लम्ब्याउने निर्णय गरेको हो । प्रशासनले भोलि (शनिबार) वैशाख २२ गतेदेखि फेरि लकडाउन थपेको हो । भोलि (शनिबार) लकडाउनको म्याद सकिँदैछ ।
बैशाख १३ गतेदेखि शुरु भएको निषेधाज्ञा एक महिना बढी भइसकेको छ । बैठकले निषेधाज्ञा थप गर्नुको विकल्प नभएको निष्कर्ष निकाल्दै सो निर्णय गरेको हो । जिल्लामा सङ्क्रमण नघटेपछि जेठ अन्तिमसम्म नै निषेधाज्ञा लम्ब्याउनुपरेको सहायक प्रमुख जिल्ला अधिकारी तथा प्रवक्ता महेशकुमार पोख्रेलले जानकारी दिए । प्रमुख जिल्ला अधिकारी उमेशकुमार ढकालको अध्यक्षतामा बसेको बैठकमा जिल्लास्थित मेयरहरुको पनि सहभागिता थियो । ‘मेयरलगायत जनप्रतिनिधि सम्मिलित बैठकले यस्तो निर्णय गरेका हौं’, उनले भने, ‘पहिला जसरी निषेधाज्ञा घोषणा थियो, त्यही अनुसार नै गर्ने निर्णय भएको छ ।’
बैठकमा खाद्यान्न पसलहरू खुलाउने भन्ने विषयमा छलफल मात्रै चलेको तर त्यो पनि नखुलाउने निर्णय भएको उनले जानकारी दिए । ‘छलफलचाहिँ चल्यो’, उनले भने, ‘तर जेठ अन्तिमसम्म त्यो पनि नखुलाउने निर्णय भएको छ ।’
उनले विकास निर्माणमा सहभागी हुने मजदुरलाई भने रोकावट नगरिने जानकारी दिए ।
यसअघिको निषेधाज्ञामा तरकारीदेखि खाद्यान्न पसलसमेत बन्द गरिएको थियो । यसपटक पनि यसैलाई निरन्तरता दिइएको उनले जानकारी दिए ।
जिल्लामा नयाँ भेरियन्टसहितको कोरोना भाइरस संक्रमण नियन्त्रणमा नआएको हुनाले निषेधाज्ञा जेठ ३१ गतेसम्म नै लम्ब्याइएको प्रमुख जिल्ला अधिकारी ढकालले जानकारी दिए । ‘विशेषतः निषेधाज्ञाले संक्रमणदर पनि घटेको पाइएकोले फलदायी भएको पाइएको छ भने जनप्रतिनिधिबाट पनि यस्तै कुरा आएको हुनाले निषेधाज्ञा थपिएको हो ।’
उनले हाल कोरोना संक्रमणको दर घट्दो रहेको जानकारी दिए । ‘निषेधाज्ञा लगाइएपछि कोरोना संक्रमण दर घट्दै आइरहेको छ, अब जेठ ३१ गतेसम्म जारी निषेधाज्ञाले अझै केही नियन्त्रणमा आउँछ भन्ने हो’, उनले भने । आदेशको अवज्ञा गरेको खण्डमा कोभिड–१९ सङ्कट व्यवस्थापन अध्यादेश, २०७८ बमोजिम दण्ड सजाय हुने जनाइएको छ ।