धरानः धरानस्थित बीपी कोइराला स्वास्थ्य विज्ञान प्रतिष्ठानमा आन्दोलनरत् संयुक्त संघर्ष समितिले प्रधानमन्त्री शेरबहादुर देउवालाई ध्यानाकर्षणपत्र बुझाएको छ ।
प्रतिष्ठानमा उच्चस्तरीय छानविन आयोग गठन हुनुपर्ने, प्रतिष्ठानका चारैजना पदाधिकारीलाई हटाउनुपर्ने, अनियमितता, भ्रष्टाचार, बेथिति र छानविनबाट दोषी देखिए कारवाहीको माग राख्दै संघर्ष समितिले देउवालाई पत्र पठाएको हो ।
बिपी प्रतिष्ठानमा एक महिनादेखि चिकित्सक र विद्यार्थी आन्दोलनरत् छन् । चिठीमा आन्दोलनरत् समूहसँग ४८ घन्टाभित्र प्रधानमन्त्री तहबाटै सचिवस्तरीय वार्ता कमिटी गठन गर्नुपर्ने माग गरिएको छ ।
प्रधानमन्त्रीले ४८ घन्टाभित्र माग पूरा नगरे शुक्रबारदेखि हरेकदिन बिहान ८–१० बजेसम्म आकस्मिक सेवा, कोभिड उपचार, पूर्वनिर्धारित परीक्षा रोक्ने चेतावनी संघर्ष समितिले दिएको छ ।
पत्रमा असार १५ गते वार्ताको क्रममा उपकुलपति मदिरा पिएर आएको भन्ने घटनाबारे निष्पक्ष छानबिन गर्न पनि माग गरिएको छ । यस्तै, दोषी देखिएमा कारवाही गर्ने, प्राध्यापक भए, नभएको सत्यतथ्य बाहिर ल्याउन माग गरिएको छ ।