विराटनगरः ‘द भ्वाइस अफ नेपाल’ को तेस्रो संस्करणका विजेता किरण गजमेरलाई प्रदेश नं. १ का मुख्यमन्त्री शेरधन राईले स्वागत तथा सम्मान गरेका छन् ।
विराटनगरस्थित मुख्यमन्त्रीको कार्यालयमै एक कार्यक्रम गरी गजमेरलाई मुख्यमन्त्री राईले स्वागत तथा सम्मान गरेका थिए । उनले प्रदेश १ मा मात्रै पाइने रुद्राक्षको माला लगाइदिँदै स्वागत गरेका थिए । राईले गजमेरलाई बधाई तथा शुभकामना दिँदै आगामी दिनमा एक औपचारिक कार्यक्रम गरी विशेष सम्मान गर्ने प्रतिबद्धता गरेका छन् ।

बिहीबार उनले भुटानी शिविर पथरीमा रहेका अशक्त र वृद्धवृद्धाहरुलाई जनही ५ हजारका दरले भत्ता समेत दिएका थिए । यो क्रम हरेक महिना रहदै आजीवन भत्ता उपलब्ध गराउने इन्ट्रा नेशनल वेलफेयर फाउण्डेशन अफ अमेरिकाका रुद्र बानियाँले जानकारी गराए । त्यस्तै, बेलडाँगीमा रहेको भुटानी शरणार्थी शिविरमा पनि किरणको लागि स्वागत कार्यक्रमको आयोजना गरिएको थियो । त्यहाँ इन्ट्रा नेशनल वेलफेयर फाउण्डेशन अफ अमेरिकाले वृद्दाश्रम निर्माण गरेको छ ।
रातको समयमा त्यहाँ पुग्दा गजमेरलाई हेर्न भनी सयौं झापालीहरु कोरोना र निषेधाज्ञाको प्रवाह नगरी प्रतीक्षामा देखिन्थे । किरणले सो ठाउँबाट अर्को एउटा एम्बुलेन्स पनि सहयोग गर्ने घोषणा गरेका छन् । अब उनले इन्ट्रा नेशनल वेलफेयर फाउण्डेशन अफ अमेरिकाको सहकार्यमा पश्चिममा १ र पुर्व पथरी र झापामा गरी २ एम्बुलेन्स प्रदान गर्ने छन् ।
कार्यक्रममा इन्ट्रा नेशनल वेलफेयर फाउण्डेशन नेपाल च्याप्टरका अध्यक्ष अभिनेता दिलिप रायमाझी, अभिनेताहरु रमित ढुंगाना र संजीत भण्डारी, समाजसेवी सुरेन्द्र शेर्मा लगायतको पनि उपस्थिति रहेको थियो । उनी यतिबेला आफ्नो जन्मथलो झापामा छन् ।