धरानः धरानस्थित बीपी कोइराला स्वास्थ्य विज्ञान प्रतिष्ठानमा चिकित्सकहरुले प्रतिष्ठान बाहिरै बसेर बिरामीको स्वास्थ्य परीक्षण गरेका छन् ।
उनीहरुले प्रतिष्ठान बाहिरै बसेर बिरामीको परीक्षण गरेका हुन् । आन्दोलनरत सङ्घर्ष समितिले ओपीडी सेवा शुरु गरेका छन् । संघर्ष समितिले आइतबारदेखि ओपिडी सेवा बन्द गरेको थियो ।
सेवा बन्द गर्दा बिरामीले दुःख पाएकोले बिरामीको दुःख देख्न नसकेपछि परीक्षण थालिएको संघर्ष समितिको संयोजक डा. एसपी रिमालले जानकारी दिए । ‘खासमा बिरामीले दुःख पाइरहेकै हुन्’, उनले भने, ‘बाहिर बसेर पनि छाला, हाडजोर्नी, बाललगायत अधिकांश सेवा दिएका छौं ।’
संघर्ष समितिका सहसंयोजक डा. विष्णु पोखरेलले प्रतिष्ठान बन्द छ भनेर थाहा नहुनेहरुको उपचार गरिएको जानकारी दिए । ‘हामीले देखाउनका लागि स्वास्थ्य परीक्षण गरेका होइन, कामै गरेका हौं’, उनले भने, ‘प्रतिष्ठान बन्द छ भनेर थाहा नहुनेहरु र झुक्किएर प्रतिष्ठान आइपुगेकालाई सेवा दिएका हौं ।’ उनले सित्तैमा गरिएको उपचार पूर्ण नभएको बताए । ‘यो नै उपचार पूर्ण होइन’, उनले भने, ‘बिरामीले दुःख नपाउन् भनेरै यसो मात्रै गरिएको हो ।
उनीहरु विगत ८५ दिन देखि आन्दोलन गर्दै आएका छन् भने प्रतिष्ठानको समस्या समाधान गर्न गठित उच्चस्तरीय अध्ययन कार्यदलले तयार पारेको स्थलगत प्रतिवदेन अनुसार काम नगरेको उनीहरुको गुनासो छ । यही कारण ओपिडीलगायतको सेवा बन्द गरिएको थियो ।