धरानः परिवर्तनका लागि सामाजिक अभियान, धरानले सामाजिक स्वास्थ्य क्लिनिक–२ सम्पन्न गरेको छ ।
७० वर्षदेखि माथिका जेष्ठ नागरिकहरुको लागि आयोजना गरिएको सो स्वास्थ्य क्लिनिक पाक्षिकरुपमा आयोजना हुने गरेको छ । बीपी कोइराला स्वास्थ्य विज्ञान प्रतिष्ठानका वरिष्ठ मुटु रोग विशेषज्ञ डा. प्रशान्त शाहद्वारा सास्थ्य जाँच हुने सो क्लिनिकमा नयाँ र पुराना बिरामी गरी ३० जनाले स्वास्थ्य जाँच गराएका थिए ।
७० वर्ष भन्दा माथिका बुवाआमाहरुलाई सजिलो तथा स्वास्थ्य सचेतना होस् भन्ने उद्देश्यले यो कार्यक्रमको आयोजना गरिएको अभियानका अध्यक्ष विष्णु बरालले बताए । धरान–१ स्थित धरान मोडल कलेजमा आयोजित कार्यक्रममा वर्षा अग्रवाल, दीपेन्द्र निरौला, भोजराज श्रेष्ठ, मोहन श्रेष्ठ, वासुदेव बराल, त्रिभुवन बराल, जेनिश शाक्य लगायतका अभियानकर्मीको उपस्थिति रहेको थियो ।
बुबालाई जाँच गराउन ल्याएको र यहाँ सहजतापूर्वक जाँच गराउन पाउँदा साहै खुशी लागेको धरान–१२ निवासी अलङ्कार पलिखेले बताए । आफ्नी आमालाई जाँच गराउन ल्याएका धरान–२ निवासी प्रमेश श्रेष्ठले पनि आयोजकप्रति आभार प्रकट गरे ।