धरानः नेकपा एमालेको १० औं महाधिवेशन चलिरहेको छ ।
पदाधिकारी दाबी गरेका नेता भीम आचार्य भने आइसोलेसनमा बसेका छन् । उनी सचिव हुन् । अन्य नेताहरु महाधिवेशनको चहलपहलमा व्यस्त रहेपनि आचार्यलाई कोरोना संक्रमण देखिएपछि आइसोलेसनमा बस्न बाध्य बनेका हुन् ।
९ औं अधिवेशनबाट माधव नेपालको पयानलबाट उनी सचिव बनेका थिए । प्रदेश १ का पूर्व मुख्यमन्त्री समेत रहेका आचार्य उपाध्यक्ष या उपमहासचिवको तयारीमा थिए । सहमति भएको अवस्थामा पुनः सचिव हुनेसम्ममा उनी राजी हुने आचार्यको सचिवालयले जनाएको छ ।
महाधिवेशनका लागि चितवन पुगेका उनलाई ज्वरो आएपछि कोरोना जाँच गरिएको थियो । चितवन पुगेपछि उनको रिपोर्ट पोजिटिभ आएको हो ।
होटल सेभेन स्टारको आइसोलेसनमा रहेका आचार्यको स्वास्थ्यमा सुधार भइरहेको जनाइएको छ । उनको अवस्था सामान्य छ । उनलाई महाधिवेशनमा खटिएको चिकित्सक टोलीको सिफारिसमा एन्टिबायोटिक सुरू गरिएको छ ।

एमालेमा तत्कालीन नेता माधवकुमार नेपालको साथ दिएका आचार्य पुनः सचिवमा दोहोरिने सम्भावना कायमै छ । यदि प्रतिस्पर्धा भइहालेमा उनले आइसोलेसनबाटै उम्मेदवारी दिने बताएका छन् ।
दश भाइ नेतामध्ये भीम रावलले अध्यक्षको दाबी गरिरहेका छन् भने घनश्याम भुसाल उपाध्यक्ष लड्ने बताइरहेका छन् । अध्यक्ष केपी शर्मा ओलीले शुक्रवार मध्यरात केन्द्रीय कमिटी बैठक बोलाएर सर्वसम्मत गराउने प्रयासस्वरूप केन्द्रीय कमिटी र पदाधिकारीको संख्या थपेका थिए । यसमा रावल र भुसाल असन्तुष्ट देखिएका छन् । ओलीलाई सर्वसम्मत हुन नदिने रणनीतिस्वरूप उनीहरूले आफ्नो अडान फिर्ता लिन मानिरहेका छैनन् ।