धरानः धरानस्थित बीपी कोइराला स्वास्थ्य विज्ञान प्रतिष्ठान, धरानले शुक्रबारबाट बिरामीको टिकट वितरणमा डिजिटल सेवाको शुरुवात गरेको छ ।
प्रतिष्ठानको मोबाइल एप्लिकेसनमार्फत बिरामीले अनलाइन टिकट लिन सक्नेछन् । सो सेवा पूर्वाञ्चलमा नै पहिलो हो ।
सो प्रविधिले घण्टौं लाइनमा बसेर पाउने सास्तीबाट बिरामीवर्गले छुटकारा पाउने प्रतिष्ठानका अस्पताल निर्देशक प्रा. डा. गौरीशंकर शाहले जानकारी दिए ।
सेवाका लागि सेवाग्राहीले एन्ड्रोइड मोबाइलको प्लेस्टोरमा गएर B.P. Koirala Institute of Health Sciences (BPKIHS) एप्लिकेसन डाउनलोड गर्नुपर्नेछ । तत्पश्चात एपबाटै टिकट काटी आफूलाई आवश्यक पर्ने चिकित्सकसँग समय लिन सक्नेछन् ।
यो सेवालाई अझ विस्तार गरी ल्याब परीक्षणका रिपोर्टहरु अनलाइनबाटै हेर्न मिल्ने एवं पेइङतर्फको बिरामी नाम दर्तासमेत यथाशिघ्र सञ्चालन गराउन उनले सम्बन्धित सबैमा जानकारी एवं आवश्यक निर्देशन दिइसकेको बताए ।
सो सेवाको उपयोग गर्न बिरामीलाई सहज होस् भनी प्रतिष्ठानको टिकट काउन्टर भवनको बाहिरपट्टि अनलाइन टिकट कसरी लिने भनेर सिकाउन सहयोगी समेत राखिएको सहप्रवक्ता डा. चुरामणी पोखरेलले जानकारी दिए ।