धरानः धरान उपमहानगरपालिकाका मेयर तिलक राईले विश्वमा महामारीको रुपमा देखा परेको कोरोना भाइरस (कोभिड १९) को तेस्रो भेरियन्ट पछिल्लो समय धरानमा पनि तीब्र गतिमा बढिरहेको जनाउँदै यसबाट बच्नका लागि सचेत र सजग रहन उपमहानगरवासीमा अपिल गरेका छन् ।
मेयर राईले मङ्लबार एक अपिल जारी कोरोना भाइरसको तेस्रो भेरियन्टबाट बच्न उपमहानगरबासीमा अपिल गरेका हुन् । मेयर राईले यदि कसैमा कोरोना संक्रमणसँग मिल्दोजुल्दो लक्षण देखिएमा वा शंका लागेमा पिसिआर, एन्टिजेन विधिबाट परीक्षण गराउन पनि आग्रह गरे । उनले कोभिडसम्बन्धी लक्षण देखिएमा नजिकैको स्वास्थ्य संस्था वा धरान उपमहानगरपालिकाको स्वास्थ्य महाशाखामा सम्पर्क गर्न पनि अनुरोध गरेका छन् ।
‘अत्यावश्यक काम परे मात्रै घर बाहिर निस्किन र निस्कनै परे अनिवार्य नाक, मुख, चिउँडो छोपिने गरी मास्क र स्यानिटाइजरको प्रयोग गर्नुका साथै साबुन पानीको प्रयोग गरी पटक–पटक हात धुन तथा सामाजिक दुरी कायम गरी स्वास्थ्य मापदण्ड अपनाएर मात्रै निस्कन पनि अनुरोध र्दछु । सार्वजनिक स्थान र स्थलहरुमा भीडभाड नगर्न पनि अनुरोध गर्दछु’ मेयर राईद्वारा जारी अपिलमा उल्लेख छ ।
महामारीको रुपमा फैलिएको यो कोभिड १९ बाट ओमिक्रोनबाट सबै जोगिन, जोगाउन आग्रह गरेका छन् । उनले सबैले आ–आफ्नो स्थानबाट महत्वपूर्ण भूमिका निर्वाह गर्न पनि आग्रह गरेका छन् । धरानमा मङ्गलबारसम्ममा १८७ जना कोरोना सङ्क्रण पुष्टि भइसकेको छ ।