धरानः सरकारले बीपी कोइराला स्वास्थ्य विज्ञान प्रतिष्ठानमा डा. श्यामसुन्दर यादवलाई उपकुलपतिको हैसियतमा काम गर्ने जिम्मेवार दिएको छ ।
बुधबार बसेको मन्त्री स्तरीय बैठकले उनलाई यस्तो जिम्मेवारी दिएको हो । आर्थिक अधिकारको प्रयोगमा यादव र महालेखा नियन्त्रकको कार्यालयबाट खटिएका अधिकृत कर्मचारीलाई संयुक्त हस्ताक्षरबाट कार्य गराउन मन्त्रालयले निर्देशन दिएको छ ।
डा.यादवले प्रतिष्ठानको नियमावली, २०५५ को नियम ६.४ बमोजिमको कार्य गर्न पाउने छन् । उनी प्रतिष्ठानमा प्रशासनिक र आर्थिक कारोबार गर्ने अधिकार नपाएपछि केही दिन अघि काठमाडौं पुगेका थिए । मन्त्रीपरिषद्को बैठकले गत पुस ३० गतेको निर्णयानुसार प्रतिष्ठान सञ्चालन गर्न कानुन बमोजिम अर्को व्यवस्था नभएसम्मको लागि प्रतिष्ठान ऐन २०४९ को दफा २० क बमोजिम सहकुलपति मार्फत प्रतिष्ठानको स्वास्थ्य र अध्ययन सेवा अवरुद्ध नहोस् भनेर डा. यादवलाई जिम्मेवार दिएको थियो ।