धरानः अधिकांश नेपाली महिलाहरूले नङहरूलाई सुन्दर देखाउनका लागि नङ पोलिस लगाउने गर्दछन् । तर, नेपाली महिलाहरूको नङ रंग्याउन अन्य देशको भर पर्नुपर्ने बाध्यता छ । भन्सार विभागको तथ्याङ्क हेर्ने हो भने नेपालमा विभिन्न देशहरूबाट करोडौँ रुपैयाँ बराबरको नङ पोलिस आयात भएको देखिन्छ ।
चालू आर्थिक वर्षको सात महिनामा तीन करोड भन्दा बढीको नङ पोलिस आयात भएको छ । भन्सार विभागको तथ्याङ्क अनुसार चालू आर्थिक वर्षको सात महिनामा विभिन्न देशहरूबाट तीन करोड ३१ लाख ८६ हजार रुपैयाँ बराबरको नङ पोलिस आयात भएको हो । नङ पोलिस आयातबाट यस अवधिमा एक करोड २२ लाख ४४ हजार रुपैयाँ राजश्व सङ्कलन भएको छ ।
तथ्याङ्क अनुसार सात महिनामा सात वटा देशबाट १५ हजार १३७ लिटर नङ पोलिस आयात भएको हो । यस अवधिमा चीनबाट सर्वाधिक नङ पोलिस आयात भएको देखिन्छ । चालू आवको माघ मसान्तसम्म भारतबाट एक करोड ८१ लाख २९ हजार रुपैयाँ बराबरको नङ पोलिस आयात भएको छ । जसबाट सरकारलाई ६६ लाख २६ हजार रुपैयाँ राजश्व प्राप्त भएको छ ।
त्यस्तै, यस अवधिमा भारतबाट एक करोड ३० लाख १९ हजार रुपैयाँ बराबरको नङ पोलिस आयात भएको छ । जसबाट सरकारलाई ४७ लाख ४८ हजार रुपैयाँ राजश्व प्राप्त भएको छ । यस्तै, अस्ट्रेलियाबाट १२ लाख ३५ हजार रुपैयाँ बराबरको नङ पोलिस आयात भएको छ । जसबाट सरकारलाई ५ लाख रुपैयाँ राजश्व प्राप्त भएको छ ।
त्यसैगरि, भन्सारको तथ्याङ्क अनुसार चालू आर्थिक वर्षको माघ मसान्तसम्म फ्रान्सबाट पाँच लाख ९८ हजार रुपैयाँ बराबरको नङ पोलिस आयात भएको छ । जसबाट दुई लाख १८ हजार रुपैयाँ राजश्व सङ्कलन भएको छ । यस अवधिमा कोरियाबाट पनि दुई लाख पाँच हजार रुपैयाँ बराबरको नङ पोलिस आयात भएको देखिन्छ । यस अवधिबाट सरकारलाई एक लाख ५२ हजार राजश्व प्राप्त भएको भन्सार विभागको तथ्याङ्कमा उल्लेख छ ।