धरानः धरानमा विशेषतः दुईवटा कार्यक्रम वर्षेनी चर्चा पाउने गर्छ । त्यो कार्यक्रम हो- धरान रन र हाइकिङ (पैदलयात्रा) ।
व्यस्त र भागदौडपूर्ण दैनिकीलाई थाँती राख्दै स्वास्थ्यका लागि हिँड्नुपर्छ भन्दै आयोजना हुँदै आएको कार्यक्रम शनिबार अझ बृहत हुने भएको हो ।
विगत ५ वर्षदेखि मानव जीवनलाई स्वस्थ जीवनयापन गर्न सन्देश दिँदै आएको ‘सेवक अभियान’ ले स्वास्थ्यको लागि पदयात्रा कार्यक्रम आयोजना गर्न लागेको हो । स्वास्थ्यका लागि पदयात्रा कार्यक्रम २०० औं सप्ताह प्रवेश गर्न लागेको अवसरमा सेवकले यस्तो कार्यक्रम गर्न लागेको हो ।
सो कार्यक्रममा प्रदेश १ का मुख्यमन्त्री राजेन्द्रकुमार राई, सभामुख प्रदीपकुमार भण्डारी, यातायात व्यवस्था तथा सञ्चारमन्त्री उपेन्द घिमिरे र पर्यटनमन्त्री खिलु लिङ्खुवाको पनि सहभागिता रहने अभियन्ता राजीव हलवाईले जानकारी दिए ।
एग्रो टुरिजमलाई समेत प्रवद्र्धन गर्ने उद्देश्यले ९.३ किलोमिटरको दुरी तय भएको उनले जानकारी दिए । उनका अनुसार धरानस्थित सिंहदेवी चोकदेखि यात्रा शुरु हुनेछ । शनिबार सिंहदेवी चोक, कृषि उपज बजारस्थल, अमरहाट, विजयपुर, बेलडाँडा, बसन्तटार, पुरानो बजार हुँदै कार्यक्रम समापन हुनेछ ।
शनिबार बिहान ६ बजेदेखि शुरु हुने कार्यक्रममा करिब ५ सय जनाको सहभागिता रहने उनले जानकारी दिए । उनका अनुसार स्वास्थ्यमा सचेत हुँदै गरेका नागरिक यो अभियानमा सरिक हुन थालेका छन् । सबै उमेर समूहका व्यक्तिहरू यस अभियानमा सहभागी हुन थालेको उनले जानकारी दिए । उनका अनुसार अहिले हाइकिङले धरानेको स्वास्थ्यमा महत्वपूर्ण भूमिका खेल्दै आएको छ । ‘हप्ताभरी काममा व्यस्त भइन्छ, छोटो दुरीको यात्राले रिफ्रेस हुन्छ, धरान नजिकै रहेको गाउँले जीवनलगायत को सहजै अध्ययन गर्न पाइन्छ, भनौं, हाइकिङले धरानेको मन तानेको छ ।’ उनले भने ।
उनका अनुसार यतिका श्रृङ्खलासम्म आइपुग्दा अहिलेसम्म कुनै रुट दोहोरिएको छैन । हरेकपल्ट नयाँ नयाँ रुट तय हुन्छ ।