उर्लाबारीः युवतीहरुको प्रतिभा उजागर गर्ने उद्देश्यले सञ्चालित मिस उर्लाबारीको तेस्रो संस्करणको तयारी गरिएको छ । तयारीसँगै पहिलो अडिसन समेत उर्लाबारीमा गरिएको छ ।
सेन्ट्रल फेशन हव उर्लाबारीको आयोजनामा हुने मिस उर्लाबारीको पहिलो अडिसनमा १८ जना युवतीहरुको सहभागिता रहेको आयोजक तथा संयोजक जीवन चिमरियाले जानकारी दिए ।
दोस्रो चरणको अडिसन शनिबार हुने उनले जानकारी दिए । पहिलो चरणको अडिसनमा मिस पूर्वाञ्चल २०१९ की विजेता रिजु भट्टराई, बैंकर सुमन गिरी, सामाजिक क्षेत्रबाट सरिता केसी, शिक्षा क्षेत्रबाट ज्ञानेन्द्र सुनारले निर्णायकको भूमिका निर्वाह गरेका थिए ।
दोस्रो चरणको अडिसन सकेर सहभागीहरुको फाइनल नाम सार्वजनिक गर्दै बन्द प्रशिक्षण थाल्ने आयोजकले जनाएको छ । यस पटक मिस उर्लाबारीमा सहभागीहरुले कुनै शुल्क तिर्नुनपर्ने भएको छ । प्रशिक्षण शुल्क समेत नलिने संयोजक चिमरियाको भनाई छ । चैत्र अन्तिममा फिनाले गर्ने गरी तयारी थालिएको मिस उर्लाबारीको पहिलो संस्करणको बिजेता नेमिता आङबुहाङ हुन् भने दोस्रो संस्करणको विजेता रुसाली केसी हुन् ।