धरानः परिवर्तनका लागि सामािजक अभियानले १ सय ३८ जना विद्यार्थीहरुका लागि निःशुल्क ब्लड ग्रुपिङ क्लिनिक सञ्चालन गरेको छ ।
महेन्द्र बहुमुखी क्याम्पसका बिबिएमका विद्यार्थीहरुले आयोजना गरेको बिजनेश एक्स्पो २०७९ मा अभियानले सो कार्यक्रम गरेको हो । अभियानका अध्यक्ष विष्णु बरालका अनुसार विद्यार्थीहरुलाई कार्यक्रममा रक्तदान सम्बन्धी अभिमुखिकरण समेत दिइएको थियो ।
‘रक्तदान कार्यक्रम गर्नुभन्दा रक्तदानको लागि अभिप्रेरित गर्न महत्वपूर्ण हो, त्यसैले हामीले आज विद्यार्थीहरुको निःशुल्क ब्लड ग्रुपिङ गरयौं र रक्तदान सम्बन्धी जानकारी पनि दियौं’, बरालले बताए ।
नेपाल रेडक्रस सोसाइटी सुनसरीको प्राविधिक सहयोगमा आयोजित कार्यक्रममा अभियानका अभियन्ताहरु त्रिभुवन बराल, जेनिश शाक्य, निशान नेपाल, हेम ढकाल, इनी शाक्य, स्वस्तिका तामाङको सहभागिता रहेको थियो ।
परिवर्तनका लागि सामाजिक अभियानले स्वास्थ्य क्षेत्रमा विगत १० महिनादेखि सामाजिक कार्य गर्दै आईरहेको छ । वरिष्ठ मुटु रोग विशेषज्ञ डा. प्रशान्त शाहद्वारा अभियानले निःशुल्क सामाजिक स्वास्थ्य क्लिनिक सञ्चालन गर्दै आइरहेको छ । विभिन्न वडामा कार्यक्रम आयोजना गर्ने लक्ष्य अनुरुप १६ औं संस्करणसम्म आयोजना भएको कार्यक्रम हरेक महिनाको पहिलो र तेश्रो शनिबार आयोजना हुने गर्दछ । यसपटक यही जेष्ठ २१ गते शनिबार सिद्धि नेवाः परिषद्, धरान–७ सँगको सहकार्यमा १७ औं संस्करणको निःशुल्क स्वास्थ्य क्लिनिक आयोजना हुने भएको छ ।