धरानः बीपी कोइराला स्वास्थ्य विज्ञान प्रतिष्ठान आसपासको औषधी व्यावसायीहरुले प्रतिष्ठानमा इम्प्लान्ट (प्रत्यारोपण) गर्न आएका बिरामीहरुसँग मनपरीरुपमा शुल्क लिएको गुनासो आएपछि वडा कार्यालयले निगरानी बढाएको छ ।
शुक्रबार धरान वडा नं. १८ का वडाध्यक्ष नरेन्द्र कुमार राई (प्रविन) को अध्यक्षतामा औषधी व्यावसायीहरुसँग बसेको छलफलले इम्प्लान्टको दररेट एकरुपता बनाउने निर्णय गरेको छ ।
बीपी कोइराला स्वास्थ्य विज्ञान प्रतिष्ठानको अर्थोमा उपचार गर्न आएका बिरामीहरुले गुनासो गरेपछि वडा कार्यालयले यस विषयमा निगरानी बढाएको वडाध्यक्ष राईले बताए ।
धरानमा इम्प्लान्ट सम्बन्धी काम गर्ने ४ वटा औषधी व्यवसायी छन् । सुजिता फामेर्सी, सृष्टि फर्मलिन्क, बज्रंग ट्रेड लिंक र अर्थो वर्ड सर्जिकलले इम्प्लान्ट (प्रत्यारोपण) गर्दा लाग्ने सामग्रीहरुको बिक्री वितरण गर्छन् । नेपाल औषधी व्यवसायी संघ धरानका अध्यक्ष मचेन लिम्बूको संयोजकत्वमा एक अनुगमन समिति समेत गठन गरिएको वडाध्यक्ष राईले बताए । औषधीहरुको दररेट उपभोक्ताहरुले देखिने राख्न लगाउन पनि आह्वान गरिने वडाध्यक्ष राईले बताए ।
वडाध्यक्ष राईका अनुसार असार ५ गते आइतबार ल्याव सञ्चालकहरुसँग छलफल गरिने छ भने ६ गते सोमबार सम्पूर्ण औषधी व्यवसायीहरुसँग छलफल गरिने छ । साथै, वडाध्यक्ष राईले बीपीको गेट अगाडि रहेको टेम्पो व्यवसायीहरु र घर मालिकहरुसँग छलफल गरी टेम्पो व्यवस्थापन गरिने बताए ।