धरानः सरकारले भेडेटार स्काइवाक निर्माणका लागि राष्ट्रिय वन क्षेत्र प्रयोग गर्न दिने निर्णय गरेको छ ।
गत असार १४ गते बसेको मन्त्रिपरिषद् बैठकका निर्णयहरुबारे जानकारी दिँदै सञ्चार तथा सूचना प्रविधिमन्त्री ज्ञानेन्द्रबहादुर कार्कीले सो निर्णयबारे बताएका हुन् । ‘भेडेटार स्काइवाक निर्माणका लागि राष्ट्रिय वन क्षेत्र प्रयोग गर्न दिइने निर्णय भएको छ’, उनले भनेका छन् ।
सो स्काइवाक धरान र धनकुटाको सीमानामा रहेको चाल्स प्वाइन्टनजिकै बन्ने भएको हो । प्रदेश १ कै प्रमुख पर्यटकीय गन्तव्य भेडेटारमा प्रदेश सरकारको अगुवाइमा तथा निजी क्षेत्रको लगानीमा भेडेटारमा स्काइवाक बन्न लागेको हो ।
भेडेटारको पूर्वाधार विकासका लागि वोन्डर्स एम्युजमेन्ट पाक्र्स एण्ड अट्राक्सन प्रालि बुढीगंगा मोरङले स्काइवाक निर्माण गर्ने प्रालिका प्रोजेक्टर डाइरेक्टर सञ्जीव रोक्काले बताए ।
प्रदेश सरकारले भेडेटारमा स्काइवाक निर्माणका लागि प्रस्ताव आहवान गरेको र सो कम्पनीमा छनौटमा परेको हो । मुख्यमन्त्री तथा मन्त्रिपरिषदको कार्यालय विराटनगरमा साँगुरीगढी गाउँपालिका, धरान उपमहानगरपालिका र प्रदेश लगानी प्राधिकरणबीच भेडेटार स्काइवाक परियोजना निर्माण तथा सञ्चालनबारे समझदारीपत्रमा हस्ताक्षर भइसकेको छ । लिजको समय अवधि, निर्माण तथा सञ्चालनको ढाँचा लगायत विषयमा परियोजना सञ्चालन पछि परियोजनाको रोहबरमा टुङग्याउने समझदारी पत्रमा उल्लेख छ ।
स्काइवाकमा शिशाको ४० मिटर बाटो बनाएर मान्छे हिँडाइन्छ । हाल लगानी स्वीकृति भइसकेको छ भने २४ करोडको लगानीमा स्काइवाक बन्ने भएको हो ।