धरानः धरानको खानेपानी व्यवस्थापनका लागि सहयोग आउने क्रम जारी रहेको छ ।
धरान उपमहानगरपालिकाका मेयर हर्कराज राई (साम्पाङ) को आह्वानमा केन्द्र मोसन पिक्चर्सको टिमले सहयोग गरेको छ । उनीहरुले २ लाख ८४ हजार रुपैयाँ बराबरको १०० मिटरको १६० एमएमको पाइप र १५ थान डस्वीन हस्तान्तरण गरेका छन् ।
समाजसेवी तथा गीतकार मीना सिंगकको पहलमा केन्द्र मोसन पिक्चर्सका सञ्चालक केन्द्र लिम्बूको सौजन्यमा पाइप तथा डस्वीन वितरण गरिएको थियो । आइतबार केन्द्र मोसन पिक्चर्सका सिइओ अरविन लिम्बूले धरान खानेपानी व्यवस्थापन बोर्डको अध्यक्ष समेत रहेका मेयर साम्पाङलाई बोर्डको कार्यालयमा पाइप तथा डस्विन हस्तान्तरण गरेका छन् ।
सो पाइप खर्दुखोलाको पानी ल्याउनका लागि प्रयोग गरिने मेयर साम्पाङले बताए । खर्दु खोलाबाट खानेपानी ट्याङकीसम्म पानी ल्याउन ४५० मिटर दुरी रहेको छ । अरु ३५० मिटर पाइप व्यवस्थापन गरी चाँडै खर्दु खोलाको पानी व्यवस्थापन गरिने उनले बताए ।
मेयर साम्पाङले खानेपानी व्यवस्थापन तथा धरानलाई व्यवस्थित शहर बनाउन सार्वजनिक रुपमा सहयोगको लागि आह्वान गर्दै आएका छन् । उनको आव्हानअनुसार सहयोग आउने क्रम जारी रहेको छ । खानेपानी व्यवस्थापनका लागि स्थानीयले धरानस्थित पकुवा खोलामा श्रमदान पनि गर्दै आएका छन् ।