धरानः कोदोको रक्सीलाई प्रवद्र्धन गर्ने उद्देश्यले सुनसरी जिल्ला तदर्थ समिति गठन भएको छ ।
धरानको मुकुमलुङ होटेलमा भएको भेलाले नगेन्द्र पारघरीको संयोजकत्वमा १३ सदस्यीय जिल्ला समिति गठन भएको छ । सदस्यहरुमा निमा पोङ्स्युवा, रिता खापुङ, लिला राई, सानु ल्वागुन, सुमित्रा राई, निर्मला राई, कमला सुब्बा, हेमराज जिमी, विश्वास मगर, बिनापुमा राई, ऐसा सुनुवार, लक्ष्मी राई रहेका छन् ।
त्यसैगरी सात जना सल्लाहकार समिति पनि गठन भएको छ । सल्लाहकार समितिमा हर्ष सुब्बा, डा.कमल तिगेला, नरप्रसाद लुङ्फुङ्बा, बिपिन इवारम, भक्तराज रसाइली, तेन्जिङ शेर्पा, ताजुव लिम्बू रहेका छन् ।
प्रदेश १ सरकारले परम्परागत घरेलु मदिरा कोदोको रक्सीलाई ब्राण्डिङ गर्ने नीति लिएपछि जनस्तरबाट नै दबाव दिने उद्देश्यले प्रदेश १ मा रहेका १४ जिल्लामा समिति गठन गरिने क्रममा सुनसरी जिल्ला समिति गठन गरिएको प्रद्र्धनन समिति संयोजक टेकबहादुर खजुमले जानकारी दिए । संयोजक खजुमले हालसम्म झापा मोरङ जिल्ला समिति गठन गरेको भन्दै साउनको दोस्रो हप्तासम्म १४ वटा जिल्ला समिति गठन गरिसक्ने तयारी रहेको बताए ।
तत्कालीन सामाजिक विकास मन्त्री उषाकलाले लिएको नीतिलाई जनस्तरबाट दबाव दिने उद्देश्यले जिल्ला समिति गठन गर्ने काम भएको उनले बताए । गठित जिल्ला समितिले स्थानीय तहमा गठन गर्नुपर्ने म्याण्डेट अनि अधिकार दिएको बताए । भेलामा संयोजक खजुमको लिखित अवधारणा प्रस्तुत गरिएका थिए । अवधारणामा देश ब्यापार घाटाको संकटबाट गुज्रिरहेको भन्दै नेपाली जनताले आ–आफ्नो स्थानबाट गम्भीर भएर सोच्नुपर्ने बताए । परम्परागत प्रविधि विकास गरी उत्पादन गरिएको रक्सि लोकप्रिय तथा भिन्न स्वाद गुण र उपयोगिता भएको अर्गानिक भएको उल्लेख छ ।
अवधारणामा रक्सी प्रवद्र्धन गर्नसके आर्थिक विकाससँगै अन्नबाली संरक्षण, मर्चा उत्पादक, मर्चामा प्रयोग हुने वनस्पति जडिबुटीको संरक्षण र उत्पादन, सुँगुर तथा बंगुरपालन लगायत विविध क्षेत्रको विकासमा समेत सकारात्मक प्रभाव पार्ने निष्कर्ष रहेको छ ।
कार्यक्रममा विशेष सल्लाहकार देशु वनेमले लोकल रक्सी उत्पादनको लागि मदिरा ऐन २०३१ र मदिरा सम्बन्धी नियमावली २०३३ ले प्रतिबन्ध लगाएको र त्यही ऐनको आधारबाट हाम्रा चेलीबेटीले उत्पादन गरेको रक्सी पोखाउने गरेको बताइन् । समितिले प्रदेश १ सरकारका मुख्यमन्त्री राजेन्द्र राई, सामाजिक विकासमन्त्री प्रकाश हाङगमसमक्ष बजेट व्यवस्थापनको लागि माग गरिसकेको छ ।
वरिष्ठ पत्रकार हर्ष सुब्बा धरान उपमहानगरमा निवर्तमान मेयर तिलक राईको कार्यकालमा तिनपाने रक्सी ब्राण्डिङ गर्ने नीति ल्याइसकेको र खाद्य प्रविधि विशेषज्ञसहितको समिति बनिसकेकोले उनिहरुसँग पनि मिलेर जान सुझाए । समिति गठन गर्नका लागि जेन्टल लावतीले समन्वय गरेका थिए ।