ताप्लेजुङः सडक खन्दै गर्दा माथिबाट झरेको ढुङ्गाले लागेर ताप्लेजुङको सिदिङ्वा गाउँपालिकामा एक युवाको मृत्यु भएको छ ।
मुत्यु हुनेमा सिदिङ्वा गाउँपालिका वडा नं ३ आङखोपका २२ वर्षीय गंगाबहादुर कडरिया रहेको जिल्ला प्रहरी कार्यालय ताप्लेजुङका डिएसपी कैलाश राईले जानकारी दिए ।
‘सडक खन्दै गर्दा झरेको ढुङ्गाले लागेर मृत्यु भएको भन्ने जानकारी आएको छ,’ डिएसपी राईले भने । उनका अनुसार घटनाको विस्तृत अनुसन्धान भइरहेको छ ।
यस्तै, धनकुटाको चौबिसे गाउँपालिका १ लडेर एकजनाको ज्यान गएको छ । सानो मोक्तरामा लडेर स्थानीय ५१ वर्षीय पूर्णकुमार मगरको मृत्यु भएको जिल्ला प्रहरी प्रवक्ता चिरञ्जिवी दाहालले जानकारी दिए । उनका अनुसार बारीमा घाँस काट्ने क्रममा लडेर घटनास्थलमा नै मृत्यु भएको हो ।
मृतकको धरानस्थित बीपी कोइराला स्वास्थ्य विज्ञान प्रतिष्ठानका पोष्टमार्टम गरि परिवारलाई जिम्मा लगाइएको जनाइएको छ ।