धनकुटाः जबरजस्ती करणीको अभियोगमा धनकुटा शहिदभूमी गाउँपालिका ५ घर भई सोही वडाका वडाध्यक्ष रहेका ३१ वर्षीय सन्तोष राईलाई पक्राउ गरिएको छ ।
राईले गत असार २४ गते तेह्रथुम लालीगुराँस नगरपालिका २ मा रहेको ताप्लेजुङ होटल एण्ड लजमा लगेर २३ वर्षीया युवतीलाई रातको समयमा धाकधम्की दिई जबरजस्ती करणी गरेको भनी जाहेरी दिएको र पक्राउ गरिएको जल्ला प्रहरी कार्यालय धनकुटाका प्रमुख एसपी लक्ष्मीराज अधिकारीले जानकारी दिए ।
पीडितले जिल्ला प्रहरी कार्यालय धनकुटामा जाहेरी दरखास्त पेश गरे पश्चात उनलाई गत २५ गते पक्राउ गरिएको हो । पक्राउ परेका राईको इलाका प्रहरी कार्यालय बसन्तपुर तेह्रथुमबाट मुलुकी अपराध संहिता २०७४ को करणी सम्बन्धि कसुर (जबरजस्ती करणी) शीर्षकमा म्याद थप गरी अनुसन्धान अगाडि बढाइएको प्रहरीले जनाएको छ ।
यस्तै, यौन दुव्यवहार गरेको आरोपमा शिक्षक समेत पक्राउ परेका छन् ।
धनकुटा–८ सान्ताङ स्थित देउराली माविका शिक्षक चन्द्रकुमार राई (एवाई) लाई प्रहरीले पक्राउ गरेको हो । आफ्नै विद्यालयका कक्षा ६ देखि १० सम्म अध्ययनरत छात्राहरूमाथि यौन दुव्यवहार गरेको भन्दै प्रहरीमा असार २६ गते उजुरी परेको थियो । राई माथि विद्यालयका ११ देखि १५ वर्षका ८ जना विद्यार्थीहरूलाई यौन दुव्यवहार गरेको अभियोग लागेको छ । प्रहरीले असार २६ गते विद्यालय हाताबाटै शिक्षक राईलाई पक्राउ गरेको एसपी अधिकारीले जानकारी दिए । छात्राहरूलाई जिस्क्याउने, ब्राको इलास्टिक तन्काई दिने, संवेदनशील अङ्गमा छुने, गालामा चिमोट्ने, कम्मरमा समातेर आफूतिर तान्ने, अश्लील शब्द प्रयोग गर्ने लगायतका क्रियाकलाप गरेको प्रहरीमा परेको उजुरीमा उल्लेख छ ।
धनकुटाको सहिदभूमी गाउँपालिका–३ कुङलाङ घर भएका ४० बर्षिया राई २०६५ सालदेखि उक्त विद्यालयमा राहत दरबन्दीमा कार्यरत थिए ।