धरानः धरानका मेयर हर्कराज राई साम्पाङले खानेपानीको हिसाब सार्वजनिक गरेका छन् ।
शुक्रबार खानेपानी बोर्डको कार्यालय (पुरानो खानेपानी संस्थान) को कार्यालयमा पत्रकार सम्मेलन गर्दै उनले हिसाब सार्वजनिक गरेका हुन् । गत आर्थिक वर्षमा खानेपानी बोर्डको आय र व्यय सार्वजनिक गरेका हुन् । उनले यो पहिलो अभ्यास हो भनेका छन् ।
गत आर्थिक वर्षमा बोर्डमा अघिल्लो वर्षको नगद मौज्दातसहित १५ करोड ४ लाख ५६ हजार ६ सय २२ रुपैयाँ आय भएको छ भने खर्चतर्फ १२ करोड ४७ लाख २३ हजार ८ सय ८४ रुपैयाँ भएको देखाइएको छ । हाल राष्ट्रिय वाणिज्य बैंकमा ३ लाख ४३ हजार ४५१ रुपैयाँ र माछापुच्छे बैंकमा २ करोड २२ लाख ९७ हजार ८८६ रुपैयाँ नगद मौज्दात रहेको पनि हिसाबमा देखाइएको छ ।
मेयर साम्पाङले आफूले खानेपानीको मुद्दा लिएर चुनाव जितेको र जनतालाई खानेपानीको हिसाब समेत सार्वजनिक गर्छु भन्ने प्रतिबद्धता जनाएअनुसार हिसाब सार्वजनिक गरेको बताए । ‘मैले चुनावताका जनतासँगै भोट माग्दै गर्दा यो कुरामा पनि प्रतिबद्धता जनाएको थिएँ’, उनले भने, ‘त्यही सुशासन र पारदर्शीताका लागि यो काम गरेको हुँ ।’

उनले व्ययभार घटाएर भएपनि जनतालाई सहुलियत दरमा पानी खुवाउने आफ्नो प्रतिबद्धता रहेको समेत बताए । ‘खासमा अहिले सरसर्ती हेर्दा खर्च बढी भएको नै देखियो’, उनले भने, ‘खर्च कम गर्दै जनतालाई पानी खुवाउन म लागिपर्नेछु ।’
मेयर साम्पाङले एडिबीबाट लिएको ऋण अझै ५४ करोड रहेको बताउँदै त्यो रकम तिरिसकेपछि धराने जनतालाई थप राहत मिल्ने बताए । ‘वर्षमा ६ करोडको दरले यो ऋण तिर्नुपर्ने देखिएको छ, त्यो चाँडै तिरिसकेपछि म धराने जनतालाई सहुलियतमा पानी खुवाउनेछु ।’ उनले प्रत्येक वर्ष तीनपटक यस्तो हिसाबकिताब सार्वजनिक गरिरहने पनि बताए । उनले बोर्डमा कर्मचारी धेरै भएकोले पनि आर्थिक भार पर्न गएको समेत बताए ।