धरानः प्रदेश १ को चर्चित पर्यटकीयस्थल भेडेटारमा वर्षौपछि खानेपानी आयोजना सफल भएको छ । त्यहाँ लिफ्टबाट पानी तानिएको हो ।
पम्पीय प्रणाली (लिफ्ट) को प्रयोगबाट नमस्ते झरनाको शिर सिरिसे खोला र सौरे खोलाको पानी डेढ किलोमिटर माथि भेडेटारमा तानिएको हो । यो नयाँ लिफ्टिङ हो ।
प्रदेश सरकार तथा स्थानीयवासीको लागत सहभागितामा ३ करोड ६७ लाख रुपैयाँको लागतमा खानेपानी आयोजना सम्पन्न भएको हो । खानेपानी आयोजनाको प्रदेश १ सरकारका खानेपानी तथा ऊर्जा मन्त्री रामकुमार राई उद्घाटन गरेका थिए । पानी तानिएसँगै भेडेटारका १ सय ४७ घरधुरीले लाभान्वित हुने जनाइएको छ ।
यसअघि भेडेटारका व्यवसायीले लिटरको दुई रुपैयाँका दरले टयाङ्करको पानी किनेर चलाउनुपर्ने बाध्यता मात्रै थिएन बोतलको पानी किन्नुपर्ने बाध्यता थियो । अझ भन्ने हो भने कतिपय व्यवसायीले खानेपानी अभावले होटल नै बन्द हुने स्थिति पुगेका थिए ।
२०६९ सालमा लिफ्टबाट खानेपानी योजना बनाइएको १० वर्षपछि यो योजना सम्पन्न भएको साँगुरीगढी गाउँपालिकाका अध्यक्ष जितेन्द्र रुम्दाली राईले जानकारी दिए । उनका अनुसार यसअघि दैनिक २ देखि ३ हजार लिटर ट्याङ्रको पानी किनेर चलाउनुपर्ने बाध्यता थियो ।
भेडेटारमा ठूला र मझौंला गरी झण्डै १ सय २० भन्दा धेरै होटल छन् । ‘म आफूले पनि पीडा भोगेकै थिएँ, पर्यटक आगमनको मुख्य सिजनमै पानी अभाव हुँदा ट्याङ्करका ट्याङ्कर पानी किन्नुपर्ने बाध्यता थियो’, उनले भने, ‘अब त्यो समस्या रहेन, अब भेडेटारबासीले प्रशस्त पानी पिउन पाउँछन् ।
पानी तानिएसँगै एक एक लाख लिटरका तीन वटा ट्याङ्कीमा जम्मा गरी अन्य ५० हजार लिटरका २ र १२ हजार लिटरका ३ वटा ट्याङ्कीमार्फत् वितरण गर्ने गरिने खानेपानी तथा सरसफाइ डिभिजन कार्यालय धनकुटाका प्रमुख राजकुमार मण्डलले जानकारी दिए ।