धरानः धरानको खानेपानीको लागि १० लाख रुपैयाँको पाइप खरिद गरिएको छ ।
खाजा खर्चका लागि उठेको ३० लाखमध्येबाट १० लाख रुपैयाँको पाइप खरिद गरिएको प्रोजेक्ट म्यानेजर दत्तकुमार लिम्बूले जानकारी दिए । खाजाका लागि देशविदेश र धरानबासीले हालसम्म ३० लाख रुपैयाँ सहयोग गरेको उनले जानकारी दिए । ‘हालसम्म खाजा खर्चका लागि मात्रै ३० लाख रुपैयाँ उठेछ, ५ लाख रुपैयाँ खाजामा खर्च गरिएको छ, १० लाख रुपैयाँले पाइप खरिद गरिएको छ ।’
सो पाइप निशाने, सर्दु र खर्दु खोलाको पानी सङ्कलन गरेर बनाइने करिब २ लाख लिटरको ट्याङ्कीबाट पानी तान्न प्रयोग गरिने उनले जानकारी दिए । सो पाइपबाट तानिएको पानी धरान–१६ स्थित गणेशमानचोक मुनि रहेको खानेपानी ट्याङ्कीमा झारिने उनले बताए ।
धरानका मेयर हर्कराज राई (साम्पाङ) को अभियानमा हालसम्म पाइप पनि सहयोग आइरहेको छ । मेयर साम्पाङले रकम नलिने र पाइप किनेर सहयोग गरिदिनुहोस् भनेर दाताहरुलाई भनेपछि उनीहरुले पाइप खरिद गर्दै धरानस्थित खानेपानी बोर्डको कार्यालय (पुरानो खानेपानी संस्थान) मा जम्मा हुँदै आएको छ ।
हालसम्म पाइप मात्रै लाखौंको आइसकेको मेयर साम्पाङले जानकारी दिए । ‘हालसम्म लाखौंको पाइप आइसकेको छ, त्यसको पनि हिसाब सार्वजनिक गर्नेछौं ।’ उनले भने । उनले पकुवा, निशाने र सर्दु खोलाबाट पानी तान्नका लागि पाइप आइरहेको जानकारी दिए ।