विराटनगरः लघुकथा समाजले लघुकथाको विकास र विस्तारमा पुरयाएको योगदानस्वरुप धरान सुनसरीकी इन्दु तोदी र सप्तरीका मनोहर पोखरेललाई सम्मान गरेको छ ।
लघुकथा समाज नेपाल प्रदेश १ द्वारा विराटनगरमा आयोजत १४ औं लघुकथा दिवसको अवसरमा उनीँहरुलाई सम्मानित गरिएको हो । बिरामी भएकाले अनुपस्थित रहेकी मोरङकी विष्णु भण्डारी आचार्यलाई आगामी कार्यक्रमको अवसर पारेर सम्मानपत्र प्रदान गरिने आयोजकले जनाएको छ ।
व्यापारमा प्रख्यात मारवाडी समुदायमा जन्मिएकी साहित्यिक प्रतिभा इन्दु तोदी पहिलो मारवाडी महिला लघुकथाकार हुन् ।। नेपाल अग्रवाल महिला मञ्च, धरानकी अध्यक्ष रहेएकी तोदी नेपाली लघुकथामार्फत् नारीभित्रको पीडा र अनुभूतिहरूलाई खोतल्न सिपालु छिन् ।
सप्तरीको राजविराजमा जन्मिएका पोखरेल सगरमाथा साहित्य परिषद्का अध्यक्ष र लघुकथा पाठ्य श्रव्य दृष्य प्रतिष्ष्ठानका व्यवस्थापक छन् । सप्तरीको साहित्यको रथ हाँक्दै पछाडि पारिएका महिला, दलित र निमुखा वर्गलाई साहित्यमा अटाउने गरेका पोखरेलका लघुकथामा तराई मधेस र मैथिली भाषाको सुभाष समेत पाइन्छ ।
यस्तै धनकुटाको चौबिसे गाउँपालिकामा जन्मिएकी आचार्य बेलबारी–८ मोरङमा शिक्षण पेशा गछिन् । कविता, लघुकथा, कथा लेखनमा रुची राख्ने उनी पछिल्लो समयमा चोटिला लघुकथा लेखिरहेकी छिन् ।

नगदसहित सम्मानपत्र प्रदान गर्दै नेपाली साहित्य र रङ्गकर्मका साधक, सडक नाटकको जन्मदाता, नाटककार अशेष मल्लले लघुकथा छोटो संरचनाभित्र आफैंमा एउटा पूर्णकथा भएको बताए । आफ्नो भाषा, सँस्कृतिलाई बिर्सिदै गए भाषा नबाँच्ने भन्दै साहित्यमा अथाह शक्ति रहेको मल्लले बताए ।
आफू जे मा लाग्यो त्यही ठूलो भन्ने प्रवृत्ति गलत रहेको भन्दै उनले साहित्य र कलाको माध्यम एउटै भएको बताए । सृजनाको प्रशस्त सम्भावना रहेको र प्राकृतिक सम्पदा, भाषा, संस्कृतिको धनी नेपालीले आत्मग्लानी नगरेर सृजनालाई कलाको रुपमा परिणत गर्न मल्लले आग्रह गर्नुभयो । शब्द, चित्र, क्यामेरामार्फत् बालबालिकाले सीपलाई तिखार्दै जानुपर्नेमा मल्लले जोड दिए ।
नेपाल प्रज्ञा प्रतिष्ठानका सदस्य प्राज्ञ विवश पोखरेलले लघुकथामा पनि जीवन प्रतिबिम्बित हुने भएकोले यसका विषयवस्तु प्रभावकारी हुने र सन्देश जीवन्त हुने गरेको बताए । नवसर्जकहरुलाई मनले छोएका कुराहरु टिपी हाल्न र समय मिलाएर सृजनामा लाग्न उनले आग्रह गरे ।
लघुकथा समाज नेपालका अध्यक्ष एवम् वरिष्ठ आख्यानकार श्रीओम श्रेष्ठ रोदनले प्रविधिको विकासले जति सहज बनाएको छ त्यति नै भावनात्मक रुपमा समाज, परिवार जटिल बन्दै गएको बताए । अहिले धेरै समय लगाएर पढने फुर्सद नभएकाले समयको माँग अनुसार लघुकथा लोकप्रिय बन्दै गएको उनले बताए । उत्सुकता जागृत गराइ राख्ने, समापन अत्यन्त प्रभावकारी र पाठकका मनमा लामो समयसम्म अनौठो तरङ्ग सिर्जना गर्ने खुबीका कारण लघुकथाले सूचना, ज्ञान र मनोरञ्जन एकसाथ दिने श्रेष्ठले बताए ।
लघुकथा समाज प्रदेश १ की अध्यक्ष ममता मृदुलको अध्यक्षता र सचिव परशुराम घिमिरेको सञ्चालनमा भएको कार्यक्रममा लघुकथा लेखन अभ्यासमा उत्कृष्ट लघुकथा लेख्नुहुने १० बिद्यालयका १० विद्यार्थीलाई समेत उपहार प्रदान गरिएको छ ।
कार्यक्रममा स्वर्गीय हेमलता उप्रेतीको नारी स्रष्टा समाजद्वारा हालै प्रकाशित लघुकथा संग्रह एउटा प्रश्नको परिचर्चा गरिएको थियो । कार्यक्रममा साहित्यकार शोभा लामा, रमेन्द्र कोइराला, निरज कोइरालालगायतकाले मन्तव्य राखे ।