धरानः धरान उपमहानगरपालिकाले अनलाइनबाटै नक्सा पास गर्न सुरू गरेको छ ।
कागतजातबिहीन उपमहानगरको अवधारणाअनुसार इलेक्ट्रोनिक बिल्डिङ परमिट सिस्टम (ईभीपिएस) कार्यान्वयनमा ल्याएसँगै अनलाइनबाटै नक्सापास शुरू गरिएको उपमहानगरपालिकाले जनाएको छ ।
ईभीपिएस सफ्टवेयर प्रयोग गरी सेवाग्राहीले आफ्नो निवेदन र इन्जिनियरले बनाएको घर नक्साको डिजाइन अनलाइनमार्फत नक्सा शाखामा पठाउन सक्नेछन् । यसपछि उपमहानगरले अनलाइनबाटै निवेदन स्वीकृत गर्नेछ ।
उपमेयर अइन्द्रविक्रम बेघाले छिटो–छरितो सेवा प्रवाहको साथै नगरबासीको सहजता र भवन निर्माण मापदण्डलाई थप प्रभावकारी बनाउन नक्सा पासलाई अनलाइन प्रणालीमा लगिएको जानकारी दिए ।
यो प्रणाली अनुसार घरनक्सा दर्तादेखि सम्पन्न प्रमाणपत्र दिने जस्ता सम्पूर्ण काम अनलाइनबाटै हुने भएको छ । यसले सेवा प्रवाहमा हुने ढिलासुस्ती र बहानाबाजीलाई निरूत्साहित गराउने उपमहानगरको विश्वास छ ।
धरान उपमहानगरपालिकाका वरिष्ठ इन्जिनियर सुरज श्रेष्ठका अनुसार धरान उपमहानगरपालिकाको पछिल्लो कार्यपालिका बैठकबाट भएको निर्णयअनुसार अबदेखि घरनक्सा पास अनलाइनबाटै हुने बताए ।
धरानमा पहिलो पटक धरान–११ निवासी देवराज पोखरेललाई डिजिटल घर नक्सा पासको प्रमाणपत्र धरान उपमहानगरपालिकाले वितरण गरेको उनले जानकारी दिए ।