विराटनगरः जन्मदिन मनाएर फर्कंदै गरेकी एक किशोरी सामूहिक बलात्कारको शिकार बनेकी छिन् ।
विराटनगर महानगरपालिका–१८ की एक किशोरी बलात्कारमा परेकी हुन् । केटा साथीसँग गए राति करिब पौने १० बजे घर फर्किंदै गर्दा केटा साथीलाई नियन्त्रणमा लिएर उनी बलात्कारमा परेको प्रहरीले जनाएको छ ।
विराटनगर–१४ स्थित सुनसरी–मोरङ सिँचाइ आयोजनाको नहरमा बलात्कार गरेको प्रारम्भिक अनुसन्धानका क्रममा खुलेको प्रहरीले जनाएको छ । जतुवा नहरनजिकै ५ जनाको समूहले किशोरीमाथि सामूहिक बलात्कार गरेको खुलेको प्रहरीले जनाएको छ । जिल्ला प्रहरी कार्यालय मोरङका डिएसपी दीपक श्रेष्ठका अनुसार नहरमा रोकेर केटा साथीलाई दुईजनाले समातेर अरु तीनजनाले बलात्कार गरेको भन्ने जानकारीमा आएको छ ।
मादक पदार्थ सेवन गरेर आएको त्यो समूहले किशोरी र उसको साथीलाई नियन्त्रणमा लिएर किशोरीमाथि बलात्कार गरेको खुल्न आएको उनले जानकारी दिए । घटनामा संलग्न रहेको आरोपमा विराटनगर महानगरपालिका ४ इक्राहीका २९ वर्षीय सन्तोष मण्डल पक्राउ परिसकेका छन् ।
प्रहरीका अनुसार ती किशोरी विराटनगरको एक होटेलमा जन्मदिन मनाएर आफ्नो प्रेमीसँग मोटरसाइकलमा बसेर फर्कंदै थिइन् । त्यो समूहले ‘एकैछिन काम छ’ भन्दै मोटरसाइकल रोकेका थिए । मोटरसाइकल रोकेपछि उनीहरुले युवालाई समात्दै किशोरीमाथि बलात्कार गरेको प्रहरीले जनाएको छ । युवा समूहको नियन्त्रणबाट भाग्न सफल प्रेमीले गाउँमा होहल्ला गरेपछि सो समूह युवतीलाई छाडेर भागेको थियो ।