धरानः धरानमा तीनदिनसम्म ‘धरान उत्सव’ मनाइने भएको छ ।
धरान डे अर्थात् धरानको उपमहानगरपालिकाको जन्मदिनका अवसरमा सार्वजनिक विदा समेत दिएर तीनदिनसम्म उत्सव मनाउन लागिएको बिहीबार कार्यपालिका बैठक कक्षमा आयोजित पत्रकार सम्मेलनमा मेयर हर्कराज राई साम्पाङले जानकारी दिए । पुस २० गतेदेखि तीन दिनसम्म विविध कार्यक्रमका साथ धरान डे लाई उत्सवका रुपमा मनाउन लागिएको उनले जानकारी दिए ।
के के कार्यक्रम हुनेछन् ?
पुस २० गते बिहान ८ बजेदेखि ९ बजेसम्ममा भुपेन्द्र स्मृति पार्क उद्घाटन हुनेछ भने बिहान ११ बजे धरान–१२ स्थित पब्लिक हाइस्कुलबाट जनजाति महासंघको नेतृत्वमा सांस्कृतिक झाँकीसहित रयाली आयोजना हुने वरिष्ठ आर्थिक विकास अधिकृत भक्तिराज शर्माले जानकारी दिए । कार्यक्रम दिउँसो १ बजे प्रमुख अतिथिले धरान डे को औपचारिक उद्घाटन गर्ने कार्यक्रम छ । सोही दिन पब्लिक हाइस्कुलको प्राङ्गणमा सम्मान, पुरस्कार वितरणलगायतका कार्यक्रम हुनेछ भने ३ बजेदेखि ६ बजेसम्म लोकदोहोरी प्रतियोगिता आयोजना हुनेछ । त्यसपछि बेलुका ९ बजेसम्म सांगीतिक कार्यक्रम शुरु हुनेछ । कार्यक्रम अवधिभर बिहान १० बजेदेखि ४ बजेसम्म स्वास्थ्यसम्बन्धी कार्यक्रम र बेलुका ६ बजेदेखि राति ९ बजेसम्म सँंगीतिक तथा साँस्कृतिक कार्यक्रम आयोजना हुनेछ ।
पुस २१ गते दोश्रो दिन बिहान ९ बजेदेखि १० सम्म मास साइक्लिङ, बिहान १० देखि १२ बजेसम्म सुनसरी सम्मृद्धिका लागि समन्वय र प्रयास विषयक जिल्लाभरीका प्रमुख तथा उप प्रमुखहरुबीच छलफल, बिहान ११ बजेदेखि १२ः३० सम्म प्रथम, दोस्रो र तेस्रो हुने निबन्ध प्रतियोगिताका निबन्ध वाचन गर्नुका साथै दिउँसो १ बजे देखि ३ बजेसम्म विद्यालयका प्रथम, दोस्रो र तेस्रो हुने लोकनृत्य प्रदर्शन गर्नुका साथै उपराहन्न ३ बजेदेखि ५ बजे सम्म रस्सी तान प्रतियोगिता आयोजना हुनेछ ।
अन्तिम तथा तेश्रो दिन शुक्रबारका दिन दिउँसो १ बजेदेखि ३ बजेसम्म समापन कार्यक्रम र ३ बजेदेखि ५ बजेसम्म जातीय संघसंस्थाहरुको साँस्कृतिक प्रस्तुति समेत रहने धरान उपमहानगरपालिकाले जनाएको छ । उपमहानगरपालिकाले रयालीमा सहभागीहरुले आ आफना जातिय भेषभुषामा सहभागी हुन सकिने र कर्मचारीका हकमा आ–आफ्नो कार्यालयको कर्मचारी परिचय पत्र र ड्रेस अनिवार्य लगाउनुपर्नेछ भने बिभिन्न संघ संस्थाका सहभागीहरुले आ–आफनो ब्यानरमै सहभागी हुन अनुरोध समेत गरेको छ ।
पर्यटन क्षेत्रलाई प्रवद्र्धन गर्ने अवसरको रुपमा पनि यो उत्सवलाई लिइएको उनले जानकारी दिए । सांस्कृतिक नाचगान र खानपानका साथै विशेष बाह्य तथा आन्तरिक पर्यटकहरुमा जानकारी गराउन उत्सव आयोजना गर्न लागिएको मेयर साम्पाङले जानकारी दिए । ‘धरान उत्सवमा धरानमा रहेका जातजातिहरुको सांस्कृतिक भेषभुषा, गरगहना, जातीय नाच र खानपानलाई विशेष बाह्य तथा आन्तरिक पर्यटकहरुमा जानकारी गराउन धरान डे मनाउन लागेका हौं,’ उनले भने, ‘त्यसको लागि सबै जुट्नु आवश्यक छ ।’
धरान डे को दिन सार्वजनिक विदा समेत दिइने मेयर साम्पाङले जानकारी दिए ।
वडाध्यक्ष पनि आए
यसअघि धरान डे मनाउने तयारी गरिहँदा वडाध्यक्षहरु उपस्थिति थिएनन् । त्यतिबेला दुईजना वडाध्यक्ष मात्रै आएका थिए । तर बिहीबार आयोजित पत्रकार सम्मेलनमा धरान उपमहानगरपालिकाका उपमेयर अइन्द्रविक्रम बेघा, धरान–१४ का वडाध्यक्ष धरान–१५ का वडाध्यक्ष नरेश इवारम, धरान–१७ का वडाध्यक्ष मनोज भट्टराई, धरान–१८ का वडाध्यक्ष प्रविन राईको उपस्थिति रहेको थियो । उत्सवका लागि करिब २२ लाख रुपैयाँ खर्च हुने समेत जनाइएको छ ।