भोजपुरः भोजपुरको अरुण गाउँपालिका–२ का ५५ बर्षीय ज्ञानबहादुर श्रेष्ठलाई श्रीमतीको हत्या गरेको आरोपमा प्रहरीले पक्राउ गरेको छ ।
श्रीमान श्रीमतीबीच घरायसी विषयमा सामान्य वादविवाह भएको भएको र वादविवादकै क्रममा रिसको आवेगमा श्रेष्ठले ४१ वर्षीया श्रीमती गंगा श्रेष्ठलाई घाँटी थिचेर हत्या गरी मल खाडीमा पुरेको भन्ने सूचना पाएसँगै प्रहरी चौकी प्याउलीबाट खटिएको प्रहरी टोलीले श्रेष्ठलाई पक्राउ गरेको प्रहरीले जनाएको छ ।
मादक पदार्थ सेवन गरी घर आएका श्रेष्ठले मादक पदार्थको सनकमा श्रीमतीको हत्या गरेको र हत्यापश्चात् घटनालाई ढाकछोप गर्न नजिकै रहेको मलखाडीमा खाल्डो खनी पुरेको प्रारम्भिक अनुसन्धानको क्रममा खुल्न आएको जिल्ला प्रहरी कार्यालय भोजपुरले जनाएको छ । घटना सम्बन्धमा थप अनुसन्धान भइरहेको प्रहरीले जनाएको छ ।

उता संखुवासभाको भोटखोला गाउँपालिका–५ का ७३ वर्षीय गोठे राईको कुटपिटबाट मृत्यु भएको छ भने बुबालाई कुटपिट गरी हत्या गरेको आरोपमा निजकै छोरा प्रेमकुमार राईलाई प्रहरीले नियन्त्रणमा लिएको छ ।
गत शुक्रबार राति ११ बजेको समयमा बाबु छोराबीच घरायसी विषयमा सामान्य विवाद भएको र छोराले बुबालाई लाठीले कुटपिट गर्दा घाईते भएका गोठेलाई उपचारको लागि जिल्ला अस्पताल लैजाने क्रममा बाटोमा नै मृत्यु भएको थियो ।
छोराको कुटपिटको कारण बुबाको मृत्यु भएको भन्ने सूचना पाएसँगै प्रहरी चौकी स्याक्सीगोलाबाट खटिएको प्रहरी टोलीले राईलाई पक्राउ गरेको प्रहरीले जनाएको छ ।