धरानः १४ वर्षीय एक बालकले लागूऔषध सेवन गरेर सवारी चलाएपछि दुर्घटनामा परेर मृत्यु भएको छ ।
मोरङको सुन्दरहरैंचा–१० स्थित खोर्साने केराबारी भित्री पक्की सडक खण्डमा दक्षिणबाट उत्तरतर्फ आउँदै गरेको को३२प ८४६१ नम्बरको मोसा आफैं अनियन्त्रित भई सडकमा पल्टिन पुगेको थियो ।
दुर्घटनामा केराबारी–६ बस्ने वर्ष १४ को जोसन लिम्बूको मृत्यु भएको प्रदेश १ ट्राफिक प्रहरी कार्यालय इटहरीले जनाएको छ । हात र छातीमा चोट लागेको अवस्थामा उपचारका लागि विराटनगरस्थित नोवेल अस्पताल विराटनगरमा लगिएको र उपचारका क्रममा बिहीबार साँझ उनको मृत्यु भएको प्रहरीले जनाएको छ । उनी लागूऔषध सेवनकर्ता समेत रहेको प्रहरीले जनाएको छ ।
उता झापाको मेचीनगर–६ पुरानो भन्सार सफारी चालकको मृत्यु भएको छ । प्र१–०१–००१ह ७६२९ नम्बरको सिटी सफारी चालकलाई चक्कर लागेपछि उनी र सफारी अनियन्त्रित भई पल्टिएको थियो । दुर्घटनामा मेचीनगर–७ बस्ने वर्ष ७२ को दयानारायण ढुङगानाको बिएण्डसी अस्पताल बिर्तामोडमा उपचारका क्रममा मृत्यु भएको प्रहरीले जनाएको छ ।