धरानः आधुनिक जीवनमा ग्याजेट प्रयोग एकथरीका लागि वरदान साबित भएको छ । पछिल्लो समय युवा पुस्ताले स्मार्ट वाच अर्थात् स्मार्ट घडी फेसनका रूपमा लिन थालेका छन् ।
ग्याजेटको उचित प्रयोगले संसारभरको सूचना प्राप्त गर्न सकिन्छ, विश्वस्थितिबारे जानकारी लिनुका साथै फुर्सदको समय कटाउन सकिन्छ । स्मार्ट घडीको सहायताले आफ्नो स्वास्थ्य अवस्थाबारे थाहा पाउन सकिन्छ ।
आशिष पौडेलले आफ्नो स्वास्थ्य अवस्थाका लागि स्मार्ट वाच लगाउन थालेको तीन महिना भएको बताए । ‘यो एकदमै सजिलो र किफायती छ । यसले ब्लडप्रेसर, अक्सिजन लेबल, पल्स रेट वर्कआउट रेकर्ड मनिटरिङ गर्ने मद्दत गरेको छ,’ उनले भने, ‘यो स्मार्ट वाचभन्दा पनि फिटवाच हो । यसले मेरो स्वास्थ्य राम्रो बनाउन धेरै मद्दत गरेको छ।’
ट्रिनिटी कलेजमा अध्ययनरत सफल लिम्बूको धेरैजसो समय ग्याजेटसँग बित्छ । उनको मोबाइल र स्मार्ट वाच सबैभन्दा प्रिय चीज हुन् ।
स्मार्ट वाच भएपछि सबै काम घडीबाटै हुने उनी बताउँछन् । उपभोक्ताको रुचि र आवश्यकता ध्यानमा राख्दै विभिन्न ब्रान्डका स्मार्ट वाच बजारमा आएका छन् ।
त्यसबाहेक विदेशमा नेपालीको बढ्दो उपस्थितिका कारण पनि सहरका कलेजमा पढ्दै गरेका नयाँ पुस्ताका युवकयुवतीको ग्याजेट पहुँच बढ्दै गएको छ । अमेरिका, बेलायत, क्यानडा, अस्ट्रेलिया, जापानमा बस्ने आफन्तलाई आफ्नो ग्याजेट अभिरुचि पूरा गर्न उनीहरू फर्माइस गर्छन् ।
युवा मात्र होइन, राम्रो आय भएका वस्यक र अधबैंशेहरू पनि स्मार्ट वाचबाट आफ्नो स्वास्थ्यको सामान्य ज्ञान हासिल गर्ने मात्र होइन, दैनिक व्यायामको रेकर्ड राख्ने अनि आधुनिक प्रविधिसँग नजिकिने विविधि कार्य गर्न तल्लीन हुन थालेकाले त्यसको फेसन बढ्दो छ।
स्मार्ट वाच प्रयोग त गर्ने तर कस्तो ? धेरैलाई कस्तो स्मार्ट वाच किन्ने भन्नेमा अन्योल हुन सक्छ । नयाँ स्मार्ट वाच किन्नुअघि विचार पुऱ्याउनुपर्ने केही कुरा ध्यानमा राख्दा पछुताउनु पर्दैन ।