धरानः फूल व्यावसायीलाई प्रेरित गर्ने उद्देश्यले धरानमा बुधबारबाट प्रदेश १ स्तरीय पुष्प प्रदर्शनी तथा व्यापार मेला शुरु भएको छ ।
फ्लोरिकल्चर एशोसिएशन सुनसरी, प्रदेशको भूमि व्यवस्था, कृषि तथा सहकारी मन्त्रालय, धरान उपमहानगरपालिकाको सहयोगमा शुरु भएको प्रर्दशनी माघ २९ गतेसम्म पाँचदिनसम्म चल्नेछ । धरान–१२ स्थित पब्लिक हाइस्कुलको खेल मैदानमा भएको प्रदर्शनीमा फूल तथा नर्सरी, मलजन्य लगायत सामग्रीसहितका स्टलहरु रहेका छन् ।
प्रदेश १ सरकारका उद्योग, कृषि तथा सहकारी विकास मन्त्री भक्तिप्रसाद सिटौलाले प्रदर्शनीको उद्घाटन गरे । कार्यक्रममा प्रदेश १ का सांसद विजयकुमार राई, रमेश बस्नेत, धरान उपमहानगरपालिकाका उपमेयर अइन्द्रविक्रम बेघा, प्रदेश १ उद्योग, कृषि तथा सहकारी विकास मन्त्रालयका सचिव मेघनाथ तिम्सिनालगायतको उपस्थिति रहेको थियो ।
प्रदर्शनी आलांकारिक, बाह्रैमास फुल्ने आउट डोर फूल, सुनाखरी, इन्डोर प्लाण्ट, भवेना, मेरिगोल्ड, गजेनिया, साल्मिया, लिरियमलगायतका मौसमी, सदाबहार, क्याक्टस, बोन्साइलगायत राखिएका छन् । मेलामा कृषि औजार, फूलमा प्रयोग गरिने कम्पोष्ट मल, फूलको गानो, बीउ बिजन पनि प्रदर्शनी तथा बिक्रीमा राखिएको छ । प्रदर्शनी मेलामा करिब ४० वटा स्टल रहेको आयोजकले जनाएको छ ।
प्रदर्शनीमा फ्लावर जोन उत्कृष्ट स्टल घोषित हुँदै प्रथम बनेको छ भने सुक्कुम प्लान्ट, क्यामेलिया नर्सरी क्रमशः द्वितीय र तृतीय भएका छन् । यस्तै, उत्कृष्ट नफुल्ने आलङ्कारिक विरुवामा एभरेष्ट नर्सरी, उत्कृष्ट फुल्ने आलङ्कारिक विरुवामा हाम्रो गार्डेन सेन्टर, उत्कृष्ट मौसमी फूल वनेम फलोरा घोषित भए ।