तेह्रथुमः तेह्रथुममा घरमाथि टयाक्टर खसेर किच्दा एकजनाको मृत्यु भएको छ ।
तेह्रथुमको म्याङलुङ नगरपालिका १० सुर्केमा ट्याक्टर अनियन्त्रित भएर घरको छानामा पल्टिएको थियो । टयाक्टर पल्टिएर किच्दा घरको भान्सा कोठामा आगो तापिरहेकी म्याङलुङ–६ की ७८ वर्षीया हर्कमति लिम्बूको मृत्यु भएको प्रहरीले जनाएको छ ।
बसन्तपुरबाट म्याङलुङतर्फ खाना पकाउने ग्याँस लिएर जाँदै गरेको को२त ५५३८ नम्बरको ट्याक्टरले उनलाई किचेको हो । गम्भीर घाइते लिम्बूको उपचारको क्रममा जिल्ला अस्पताल तेह्रथुममा मृत्यु भएको प्रहरीले जनाएको छ ।
यस्तै, टयाकटरले पैदलयात्री ६२ वर्षीय दलबहादुर लिम्बूलाई ठक्कर दिएको थियो । गम्भीर घाइते दलबहादुरको जिल्ला अस्पतालमा उपचार हुन नसकेपछि धरानस्थित बीपी कोइराला स्वास्थ्य विज्ञान प्रतिष्ठान ल्याइएको प्रहरीले जनाएको छ । दुर्घटनामा संलग्न ट्याक्टर चालक वर्ष २२ का देशबहादुर लिम्बूलाई प्रहरीले नियन्त्रणमा लिएर घटनाबारे अनुसन्धान शुरु गरेको जनाएको छ ।