झापाः मेचीनगर नगरपालिकाका –४ का वडा अध्यक्ष अर्जुन कार्कीले हात्तीपीडित जनतालाई उचित राहत प्रदान गर्न सरकारसमक्ष माग गरेका छन् । सोमबार आयोजित एक कार्यक्रममा उनले सो माग गरेका हुन् ।
बाहुनडाँगी क्षेत्रका हात्तीपीडित जनतालाई उचित राहत र दीर्घकालीन समस्या समाधानका लागि सरकारले स्पष्ट योजना बनाउन माग गरे । हात्तीपीडित जनतको राहतका लागि स्थानीय सरकारले केही मल्हमपट्टीको प्रयास गरे पनि त्यो पर्याप्त नभएको उनको भनाइ छ । मानव र हात्तीको सहअस्तित्व कायम गरेर अगाडि बढ्न सकेमात्रै भलाइ हुने उनको भनाइ छ ।
हात्तिहरु दिनभरी भारतको कोलाबारीमा बस्छन्, राति भएपछि नेपालतिर आएर अन्नबाली, जनधनको क्षति गर्छन् कार्कीले भने, “अहिलेसम्म पीडित परिवारका लागि हामीले स्थानीयस्तरबाट सानातिना मल्हमपट्टीको काम गरे पनि परिवारको शिक्षा दीक्षा, स्वास्थ्य स्थिति के छ, आयआर्जन के छ भन्नेबारेमा राज्यको ध्यान पुगेको छैन ।”
स्थानीय तहको सानो पहलले मात्रै समस्या समाधान नभएको भन्दै सिंहदरबारको ध्यानाकर्षण गराउन आफू काठमाडौं आएको पनि उनले बताए । पीडितको माग सम्बोधनमा ढिलाई गर्न नहुने उनले सरकारसँग माग गरे ।