रंगशालामै बनेको घण्टाघर र खेल तमासाले मन तान्यो, सेल्फी हान्न तछाडमछाड, प्रदेश १ का सबै जिल्लाका स्थानीय उत्पादनको प्रदर्शनी हुने (१० तस्वीर र भिडियोसहित)

धरानः धरान–१६ स्थित धरान रंगशालामा हुन लागेको ‘धरान एक्स्पो’ को भोलिदेखि शुरु हुँदैछ ।
अहिले धरान रंगशाला मुनि रहेको मिनी रंगशालामा स्टल व्यवस्थापन, सजिसजाउलगायतको काम लगभग सकिएको छ । आयोजक सुनसरी उद्योग वाणिज्य संघले पत्रकार सम्मेलनको आयोजना गर्दै तयारी पूरा भएको जनाएको छ । रंगशालामा स्टल व्यवस्थापन गरेर चिटिक्क पार्दैै घण्टाघर निर्माण, सेल्फी हान्ने ठाउँ, खेल, मनोरञ्जन समेत गर्न पाइने व्यवस्था गरेको छ । रंगशालामै बनेको घण्टाघरले स्थानीयको मन तान्दै गएको छ । उद्घाटन नहुँदै सेल्फी हान्न तछाडमछाड गरेको दृश्य पनि देखिएको छ ।
एक्स्पोमा प्रदेश १ का सबै जिल्लाका स्थानीय उत्पादनको प्रदर्शनी हुने आयोजकले जनाएको छ । उद्घाटन भोलि दिउँसो १ बजे हुने भएको छ । एक्स्पोको उदघाटन प्रदेश १ का मुख्यमन्त्री हिक्मत कार्कीले गर्ने कार्यक्रम छ । कार्यक्रममा उद्योग वाणिज्य महासंघका उपाध्यक्ष रामचन्द्र सांघाई, पूर्व अध्यक्ष चण्डीराज ढकाल लगायतको पनि सहभागिता रहनेछ । त्यस्तै, एक्सपो समापन कार्यक्रममा संस्कृति, पर्यटन तथा नागरिक उड्ययन मन्त्री सुदन किरातीको पनि उपस्थिति रहने आयोजक संस्थाका अध्यक्ष विजय श्रेष्ठले जानकारी दिए ।
एक्सपोमा भारत पाकिस्तान र बंगलादेशका १५ वटा स्टल रहने छन् । पर्यटनसँग सम्बन्धित ४ वटा, स्वास्थ्यसँग सम्बन्धित ४ वटा स्टल रहने छन् । एक्स्पोमा साहित्यसँग सम्बन्धी स्टल पनि राखिएको जनाइएको छ । एक्स्पोमा सुनसरीका रैथाने उत्पादनलाई उच्च प्राथमिकता दिईएको छ । जहाँ मह, अचारका परिकारहरुका साथै माछा, सुकुटी, चिया, फूल, धराने कालो बङ्गुरका परिकारपनि पस्किने एक्स्पोका स्टल संयोजक विष्णु बरालले जानकारी दिए ।
एक्स्पोमा दिउँसो २ बजेसम्म प्रवेश निःशुल्क रहनेछ भने २ बजे पछिको प्रवेशमा ५० रुपैयाँ तोकिएको आयोजकले जनाएको छ । कार्यक्रममा हरेक दिन राष्ट्रिय कालाकारहरूको साङ्गीतिक प्रस्तुति समेत रहने आयोजकले जनाएको छ ।
धरान उपमहानगरपालिका र प्रदेश १ सरकारको सहयोगमा फागुन ११ देखि २० गतेसम्म आयोजना हुने एक्स्पो धरान रंगशालाको तल्लो खेल मैदानमा हुनेछ ।
तस्वीरहरुः लक्ष्मण थापा, हाम्रो कोशी आवाज