धरानः लायन्स क्लबको ३२५ सी को पहिलोपटक धरानमा ऐतिहासिक महाधिवेशन सम्पन्न भएको छ ।
कार्यक्रम हुनुअघि शान्ति रयालीका साथ आयोजना भएको थियो । ‘हामी सेवा गर्छौं’ भन्ने मूलमन्त्रको साथ समाज परिवर्तन र सेवाको भावनासाथ कार्यक्रम भएको हो ।
यसैबीच डिस्ट्रिक गभर्नर पदमा भएको प्रतिस्पर्धामा दमकका बबरजंग थापाले १९४ मत ल्याई विजयी बनेका छन् । उनका प्रतिद्वन्द्वी दमककै अजय अग्रवालले १४२ मत प्राप्त गरेका थिए । यसअघिका डिस्ट्रिक गर्भनर लायन धीरज गुरुङका अनुसार धरान–१५ स्थित चुम्लुङ भवनमा भएको महाधिवेशनमा १० वटा जिल्लाबाट ७ सयको हाराहारीमा प्रतिनिधि तथा अतिथिहरुको सहभागिता थियो । कार्यक्रमको उद्घाटन डाइरेक्टर एवं इन्जिनियर सञ्जय खेतानले गरेका थिए ।
कार्यक्रम उद्घाटनअघि विभिन्न जातजातिको बाजागाजासहित झाँकी पनि निकालिएको थियो । रयालीमा रोयल इस्टर्न इनफिल्ड ग्रुप, पञ्चेबाजा, डिस्ट्रिक ३२५ सी ग्रुप, धरान लायन्सका गभर्नर किरात जातिको साकेला समूह, लिम्बू जातिको च्याब्रुङ समूह, नेवारी समुदायको धिमे बाजा समूह, साइक्लिङ धरान ग्रुप र सुरक्षा टोली समेतको सहभागी रहेको थियो ।
तस्वीरहरुः लक्ष्मण थापा

‘