धरानः आमा र छोरी चढेको स्कुटरलाई टिपरले ठक्कर दिएपछि इटहरी केहीबेर तनावग्रस्त बन्यो ।
इटहरीको मुख्य चौकमा टिपरको ठक्करबाट एक महिलाको मृत्यु भएको हो । कान्छाराम कन्स्ट्रक्सनको ना१क ९१०७ नम्बरको टिपरले को१४प ५२६ नम्बरको स्कुटरलाई ठक्कर दिएको हो । टिपरले ब्याक गरी मान्छे महिलाको मृत्यु भएको आफन्तको दावी छ । प्रहरीले भने त्यसबारे अनुसन्धानपछि केही खुल्ने जनाएको छ । स्थानीयवासीले टिपर तोडफोड समेत गरेका थिए ।
स्कुटरलाई ठक्कर दिँदा इटहरी उपमहानगरपालिका–८ की ३९ वर्षीया सरिता चौधरीको मृत्यु भएको जिल्ला प्रहरी कार्यालय सुनसरीले जनाएको छ ।
गम्भीर घाइते छोरी अनुषा चौधरीको विराटनगरको अस्पतालमा उपचार भइरहेको छ । घटनापछि तनावग्रस्त बनेको इटहरी अहिले शान्त भएको छ । आक्रोशित समूहलाई नियन्त्रणमा लिनका लागि प्रहरीले ३ राउन्ड अश्रुग्यास प्रहार गरेको थियो ।
आक्रोशितले प्रहार गरेको ढुंगा लागेर ६ जना नेपाल प्रहरी र ३ जना सशस्त्र प्रहरी घाइते भएका सुनसरी प्रहरीले जनाएको छ । इटहरीको खनारमा भदैनीको घरमा पूजामा जान हिँडेका आमाछोरीलाई इटहरी चोकमा टिपरले ठक्कर दिएको थियो । प्रहरीले टिपर चालक सर्लाही ईश्वरपुरका २७ वर्षीय बलबहादुर बम्जनलाई पनि नियन्त्रणमा लिएको जनाएको छ ।