धरानः इटहरीको मुख्य चौकमा भएको दुर्घटनामा गम्भीर घाइते छोरीको पनि मृत्यु भएको छ ।
उनको उपचारका क्रममा मृत्यु भएको प्रहरीले जनाएको छ । मङ्गलबार साढे ३ बजे टिपरको ठक्करले इटहरी–८ की सरिता चौधरीको घटनास्थलमै मृत्यु भएको थियो भने उनकी छोरी २२ वर्षीया अंशु चौधरी गम्भीर घाइते भएकी थिइन् । गम्भीर घाइते उनको न्यूरो अस्पताल विराटनगरमा उपचारका क्रममा मृत्यु भएको प्रहरीले जनाएको छ ।
आमा र छोरी चढेको स्कुटरलाई टिपरले ठक्कर दिएपछि ब्याक गरेको मारेको आरोप लगाउँदै स्थानीयबासीले गरेको प्रदर्शन र टिपर तोडफोडपछि इटहरी केहीबेर तनावग्रस्त बनेको थियो । कान्छाराम कन्स्ट्रक्सनको ना१क ९१०७ नम्बरको टिपरले को१४प ५२६ नम्बरको स्कुटरलाई ठक्कर दिएको थियो । टिपरले ब्याक गरी मान्छे महिलाको मृत्यु भएको आफन्तको दावी छ ।
घटनापछि तनाबग्रस्त बनेको इटहरी अहिले शान्त छ । आक्रोशित समूहलाई नियन्त्रणमा लिनका लागि प्रहरीले ३ राउन्ड अश्रुग्यास प्रहार गरेको थियो । इटहरीको खनारमा भदैनीको घरमा पूजामा जान हिँडेका आमाछोरीलाई इटहरी चोकमा टिपरले ठक्कर दिएको थियो । प्रहरीले टिपर चालक सर्लाही ईश्वरपुरका २७ वर्षीय बलबहादुर बम्जनलाई पनि नियन्त्रणमा लिएको जनाएको छ ।
यता धरान–८ सेउती पुल छेऊमा बा२१च ८१० नम्बरको टाटा कम्पनीको सानो पिकअप रोकेर सडक बत्ती झार्ने क्रममा अचानक लड्दा रामधुनी–२ बस्ने ओमप्रकाश चौधरी लडेर गम्भीर घाइते भएका छन् । उनको धरानस्थित बीपी प्रतिष्ठानमा उपचार भइरहेको प्रहरीले जनाएको छ ।