पाँचथरः पाँचथरमा पनि जनश्रमदानबाट पुल बनाउन थालिएको छ ।
पाँचथरको फालेलुङ गाउँपालिकास्थित हेंवा खोलामा केही हप्ताअघि आएको बाढीले पुल भत्काएको थियो । पुल भत्काएपछि यातायात ओहोदोहोर गर्न सकेका थिएनन् ।
गत असार २ गतेको बाढीले पुल भत्काएपछि ठप्प रहेको यातायातलाई शुरु गर्न डाइभर्सन निर्माणमा स्थानीय जुटेका हुन् । केन्द्र र प्रदेश सरकारले पुल बनाउन चासो नदिएपछि स्थानीयहरू जुटेका हुन् । गाउँपालिकासँग पर्याप्त स्रोत नभएपछि पालिकाले श्रमदानका लागि जनतालाई आह्वान गरेको थियो । आह्वानपछि सयौँको संख्यामा सर्वसाधारणहरू जुटेर डाइभर्सन निर्माणमा खटेका गाउँपालिका अध्यक्ष बिरबिक्रम थाम्सुहाङले बताए । पालिकाको आह्वानलाई सर्वसाधारणले साथ दिएकाले डाइभर्सन निर्माण गर्न सहज भएको पालिका उपाध्यक्ष महेन्द्रहाङ जबेगुले बताए । बाढी पहिरोले पुल भत्काएपछि फालेलुङ र अन्य स्थानीय तहको सम्पर्क विच्छेद भएको छ ।
श्रमदानबाटै हेंवा खोलामा पाँच वटा ह्युम पाइप राखिएको छ। ह्युम पाइप राखेर ढलान गर्ने काम सकिएकाले अबको तीन दिनभित्रमा यातायात सुचारु गर्न सकिने पालिकाले जनाएको छ। असार २ गतेको बाढीले फालेलुङस्थित हेंवा खोलाका दुई वटा पक्की पुल भत्काएको थियो । जसका कारण यातायात ठप्प बनेको छ ।
बाढी पहिरोका कारण पालिकामा २२ करोड बराबरको भौतिक संरचनामा क्षति पुगेको छ । पालिकाले आर्थिक सहयोग गर्न इच्छुकहरूलाई सहयोगको आह्वान समेत गरेको छ । हालसम्म आठ लाखभन्दा धेरै रकम संकलन भएको छ ।
तस्वीरः भीम बाँस्कोटा